ربوعيتنا

التطوير الشخصي

صحة و رياضة

نمط حياة صحي [ عادات صحية - غذاء - رياضة - نوم ]| #تحدي-النافذة

by - 3:03 AM

Hi .. ✨


💬
الصحة و الرياضة ونمط الحياة الصحي مصطلحات و عالم كلنا نفسنا نكون متعمقين فيه ، و نفسنا نكون رياضيين ومهتمين فأجسامنا و مدققين في أكلنا و عاملين لنفسنا حدود ومراقبة للداخل والطالع ..

حالياً احنا في صحوة للرياضة والصحة ، كل يوم نسمع نادي جديد فتح ، وعروض جبارة في النادي الثاني ، ومدربين شخصيين في مواقع التواصل ، وتجارب و معلومات وبرامج في اليوتيوب والمدونات ..

هالشيء يفرّح حيل ، انك تكون في مجتمع يشجعك ويحمسك و بنفس الوقت تسير الخيارات متاحة والبدائل كثير ، بالتالي اسعار أقل وخدمات اكثر للمنافسة ..

طيب الصحة مو بس رياضة ! 
" تسمحون لي اتفلسف شوي ؟ "

الصحة في رأيي اربع جوانب كلها أساسية [ رياضة - نوم كافي - غذاء - عادات ]

وحدة من خططي الاستراتيجية في حياتي هي اني اوصل لعمر الستين وأنا بعافيتي وقايمة بنفسي ومو محتاجة لأحد .. 🙄 " قلت ستين لأني اتمنى اعيش ستين سنة فقط وبعدها اطير بسلام "
... Anyway 

ولأن الصحة والرياضة هي أشياء بعيدة المدى ، وتأثيرها يبان لمن نكبر ونتقدم فالعمر غالباً فشبابنا مانكون مهتمين لها ولا حاسين باهميتها .. بس اذا طاح الفاس بالراس وقتها مافي رجعة " الموضوع مرعب شوي " 😰
فـ اجلس مع نفسك واتخيل سنة بسنة كيف بتكون لو كملت على نمط حياتك الحالي ، وكيف لو اتغيرت وقرر ..

# لسى باقول كل كلامي هو فلسفة من مخي الجميل ماعرف لو فعلاً صحيح أو خاطئ .. لكن ان شاء الله صح 😁

الرياضة
🏋🏻‍♀️
أكثر مجال مع الطب في تضارب المعلومات 😑
تلاقين مدربين اثنين ثقة ومو بياعين كلام بس واحد يقولك معلومة والثاني يقول عكسها تماماً ، وتبقين محتاره مين الصح ؟

لكن برأيي التجربة والخطأ هي طريقة كويسه رغم صعوبتها ، لكن انتا جرب كلام الاثنين وشوف يطلع معك كلام مين الصح واعتمده ، وابني خلفيتك بنفسك ..👌🏼

شعور الانجاز بعد الانتهاء من حصة اليوم الرياضية ، وشعور السعادة مع تسارع دقات قلبك وانفاسك ، شعور الشاور البارد بعدها والراحة بعد الجهد .. شعور السعادة بعد كل تمرين و الروتين الجميل اللي لو يوم مالحقتي تتريضين تحسين ناقص يومك وفي شيء لازم تسوينه ..

ومع الأيام شعور اللياقة والنشاط والصحة والخفه لذيذ ويحسسك بالانجاز وثمرة التعب .

الجسم الرياضي مايعني جسم منحوت نحت ، تقسيم جسمك وبُنيتك خلقة ماتتحكمين فيها ( اندو - ميزو - اكتو )

الجسم الرياضي جسم لياقته عالية ، مشدود بعيد عن الترهل - متكون من كتل عضليه مو دهون - مافي سليولايت ...)

الرياضة فايدتها مو فقط على شكل الجسم ، تفيد في الدورة الدموية يعني وظائف حيويه افضل ، تأخر وحتى تمنع الزهايمر ، تفتح الشهية وتساعد على التخلص من الفضلات ، قوة جنسية أكبر ، تقوي جهاز المناعة وتمنع الأمراض المزمنه ... 

وماننسى انو الشخص الرياضي أكثر بعد عن الاكتئاب ، وهالنقطة جداً مهمة لمرحلة الكهولة ، الرياضة ماتتعودين عليها بيوم وليلة ، بتبقين تجاهدين نفسك شهور حتى تسير روتين اساسي فحياتك ، كمان مقاومتها للاكتئاب شيء طويل الامد ، و الانسان بعد التقاعد و في سن اليأس يكون مو بس عرضه للأمراض الصحية حتى النفسية كمان ، بعكس الشخص الرياضي .. اقرأوا عن هالموضوع بالذات لحاله بيحمسكم تدخلون الرياضة فحياتكم للأبد ..

" دايماً بأقول في شبابك أمّن كهولتك وشخوختك ، صح ماتدري لأي عمر ربنا يعمّرك ، لكن افترض سبعين سنه ، كيف تحب تكون ؟ أكيد تبغى عيشه كريمة ، لا عالة على أحد حتى لو ابناءك ولا طريح الفراش ولا ولا ولا .. صحتك شايلتك و مالك وابناءك ؛ ليش هالترتيب بالذات ! لأن لو عندك مال بدون صحة بيروح في علاجك أكيد ومابيفيدك ، ولو عندك صحة ومال بس بدون ابناء أو بنفور وعقوق أو خلينا مانقول عقوق بس عدم بر واهتمام من الابناء بيبقى شعور الوحدة ياكلك ، استثمارك في حياتك فصحتك و مالك وابناءك كلهم مالك غنى عنهم " > مجرد رأي 😅

النوم
😴
النوم هوايتنا كلنا ، كلامنا مو على كمية النوم لكن متى وكيف ننام .. مادري خرافه او صدق انو لازم ننام فالليل بس أنا مؤمنه انو النوم بالليل يفرق " مو قلنا نجرب بنفسنا ؟ " انا لو انام ١٢ ساعه بالنهار اقوم بكل خمول وكسل وماحس اني الا انسدحت وغمضت ١٢ ساعه وقمت ، بعكس الليل اللي احس لو نمت ساعتين وقمت اكون متنشطة وجسمي فعلاً ارتاح ..
حتى اوقات لمن تجيني حالات الارق الموسمية اروح استرخي اخر الليل واثبت علي حركة وحده واعتبر اني نايمة ، ادري اني مابنام لكن اعتبرها نص نومه من الراحة والاسترخاء .

يُقال والعهده على القائل انو الجسم فوقت النوم ينمو ويكبر ويبني نفسه ، فلمن تكونين نايمة بالليل يزيد من نموك ، وانو عشان كذا البيبهات ينامون كامل يومهم عشان يحتاجون يكبرون وينمون بسرعه .

ضبط الساعه البيولوجية في الجسم " هي ساعة داخلية فطرية تسير ذاتيا، لكن يعاد ضبطها بمؤثرات خارجية " 
يعتمد على النوم بشكل أساسي " والله الحياة بكبرها يعتمد ترتيبها على ضبط النوم " 😩
لكن الساعة البيولوجية تساعدك تكونين صحية أكثر ومتفاهمة مع جسمك ، مادري فين سمعت انو تحتاجين لضبط ساعتك فقط تصحين بموعد ثابت يومياً ، بغض النظر متي نمتي ، فترة بسيطة ويبرمج جسمك نفسه بنفسه ، سبحان الله .

الأكيد انو النوم يعطي وجهك نضارة وحياة ، ولجسمك طاقة تعيشين يومك وتتريضين ، وراحة لمخك الجميل ، وتجربتي علمتني كمان انو الجسم يعطيك على جوّك ، اذا اتعودتي تنامين ٤ ساعات فاليوم بيتأقلم وبعد فترة يسير يشبع من ٤ ساعات فقط ، ولو اتعودتي تنامين ١٢ ساعة مابتشبعين وتصحصحين الا اذا صكيتي الـ ١٢ كاملة ، شوية جهاد وضبطت نفسي علي ٦-٧ ساعات وأوقات ٤ وابقى اليوم كله باور باور ماشاء الله .

الغذاء
🥗
هاها وصلنا للزبدة و اللب ، اش ماتحطين فجسمك بيكوّن جسمك ، حطيتي تمر و حليب وفواكة وبقوليات بيطلع بمزيج منهم ، حطيتي شيبس ومقالي و خبز ابيض وغازيات بيطلع بمزيج منهم ..

اشوف انو اكلنا هو أكثر شيء نحتاج نسوي له نفض واعادة صياغه " أو بالنسبة لي يمكن " 🙄

كمان الأغذية من الأمور اللي تتعارض فيها معلومات الأطباء ، لكن نرجع لقانون التجربة ، الإنسان طبيب نفسه الأول ..
تابعي نفسك إش ينفخ بطنك ويسبب لك غازات ، و إش ينفر الحبوب بوجهك ؟ و إش يسبب لك حساسية وهكذا ...

شوفي انت الآن اش تاكلين عالاقل خلال ثلاث اسابيع سجلي بدفتر كل شيء خش جسمك ، وبعدها قيمي نفسك وحطي خطة [ الشهرين الأولى اقلل مقالي بالتدريج حتى اقطعهم تماماً " مع توفير بدائل مغنية بنفس الوقت " - الشهرين اللي بعدها أكل المطاعم إجمالاً " توفير بدائل منزلية سريعة ولذيذة " - الشهرين اللي بعدها التقليل من السكر والملح ... وهكذا ]

خلال سنة بتكونين اتخلصتي من ٦ عادات سيئة في الأكل / ممكن السنة اللي بعدها تكون لإضافة عادات جديدة لكل شهرين 💪🏼 ...
# لاتقولين وي طويلة ، خذي راحتك لأنه نمط حياة انت بتستمرين طول عمرك يعني للأبد للأبد على هالنظام ، اللي يجي بسرعة يروح بسرعة ، خذي وقتك واتعودي علي كل شيء ولاتبدأين بالخطوة اللي بعد إلا ماتكونين انتهيتي من الأولى وحطيتي بديل راضيه عنه ١٠٠٪

العادات 
وعلى طاري العادات ، نمطنا الصحي عبارة عن مجموعة عادات ، والعادات الصحية بحر كبير ...
= فيما يخص الأكل :
- شرب كوبين ماء علي الريق
- شرب كوب ماء بملعقة عسل على الريق
- شرب كوب ماء بخل مخفف علي الريق
- شرب الماء بكمية مناسبة للجسم " وهذي من أهم و أصعب العادات "
- عدم الشرب مع الأكل ولا بعده بساعه
- تخفيف وجبة العشاء و تبدير وقتها
- تقليل أو الامتناع عن السكر والملح المكرر
- أكل حصة سلطة خضار يومياً
- أكل حصة فواكة أو سموذي يومياً

= فيما يخص الحياة :
- الهرولة وممارسة الرياضات
- سحب البطن للداخل
- تمارين كيجل
- الجلسة المعتدلة
- عمل ديتوكس موسمي للجسم
- عمل فحوصات وتحاليل دورية 
- اخذ مكملات غذائية
- التقشير الجاف للجسم
- النوم على الظهر بشكل مستقيم أو الجنب الأيمن
- عمل مساج وتدليك للجسم و الوجه بشكل دوري
.
.
.

والعادات بحر كبير ، حلو نتعود عليها حبه حبه و نعوّد اللي حوالينا أهلنا واحبابنا 
وحلو نتثقف عن الأمراض و اسبابها ، ونشوف الوراثه في عائلتنا ونهتم على الأخذ بالأسباب لتجنبها أو تأخيرها قدر الإمكان ..

كانت هذي فلسلفة مخي الجميل للحياة الصحية ، يارب استفدتوا
قولولي انتو مخكم الجميل بإش يؤمن صحياً ؟
و إش كانت تجاربكم ؟

❤︎

You May Also Like

5 comments