وصفات فطور سريعة ولذيذة لأيام العزقه | #تحدي-النافذة
يامرحباً ..
اوقات كثير ناخذ عهد على انفسنا م نهمل وجباتنا و تكون منزلية و مغذية لكن تطلع لنا ايام عبيطه ، ضغط شغل أو نفسيه ضاربه أو تروح علينا نومه أو ماندري اش ناكل فناكل اي خربوطه تسكت جوعنا أو نبطل موليّه ☹️✖️
عشان كذا لازم يكون عندنا افكار لوجبات سريعه ولذيذه و مشبعه تفك ازمتنا 💡
باقترح اقتراحات سريعه للفطور ، لأن الفطور أكثر وجبه وقتها معزوق وهي مهمة ، بس غالباً مابيكون لنا شهية فنحتاج شيء خفيف وسريع ..
# الثلاث وصفات الأولى عادي تتجهز من الليل .. وتنحفظ بالثلاجة
الوصفتين الأخيرة هي سريعة تتصلح فوقتها " للأيام اللي تروح عليك نومة 🤪"
(١)
❜ ادام بندورة بالتونه
- بصله وسط و ثلاث فصوص ثوم
- خمس بندورات
- معجون طماطم نص العلبة
- علبتين تونه كبيرة مفرغه من الزيت
- ملح - فلفل - كمون - حبة ماجي - بهارات مشكلة
🥘
⦁ نفرم البصل والثوم ، ونشوحهم بالزبدة
⦁ نهرس البندورات في محضرة الطعام ، ونضيفها للبصل
⦁ نضيف معجون الطماطم و البهارات رشة من كل شيء والبهارات المشكلة م ص بس .
⦁ نخليهم يتسبكون " نغطيهم ونرخي النار وكل شوي نقّلبهم الين يسيرون مهروسين ومتجانسين تقريباً عشر دقائق " ..
⦁ نذوقها ونتأكد من توازن النكهات ، وناخذ ربع الكمية علي جنب " أقولكم في اش نحتاجها بعد شوي 😉 "
⦁ نضيف كوب ماء ونحركه ونتركه خمس دقايق ، لو القوام لسى ماوصل لقوام الإدام نضيف كوب ماء ثاني ..
⦁ لمن نوصل للقوام المطلوب نضيف التونه المعلبه بعد مانصفي الزيت ..
⦁ خمس دقايق تحريك ، ونرفعها عن النار
و بالعافية 😋
(٢)
❛ بيتزا التوست
- حبات توست حسب الحاجة
- خلطة البندورة " ايوا اللي اخذناها من الإدام "
- زيتون مقطع
- فلفل أخضر مكعبات صغيييرة
- جبنة شرائح
🥪
⦁ نحمّص التوست
⦁ نضيف الجبنه " اخترت الشرائح حتى تكون ارتب فتقدرون تستبدلونها بالتشيدر "
⦁ نضيف ملعقتين من صوص البندورة و نوزعه
⦁ نضيف الزيتون و الفلفل
⦁ نقفل التوست بتوست ثانيه ونقسمها مثلثات
وبالعافية 😋
(٣)
❜ بيض بارد بالخضار
- بيضتين مسلوقة
- حبة بندورة و حبة فلفل أخضر مكعبات
- بقدونس مفروم
- ٢-٣ م ك جبنة سائلة
- م ك طحينة سائلة
- م ص صويا صوص / م ص دبس رمان
- م ك طحينة سائلة
- م ص صويا صوص / م ص دبس رمان
( فلفل أسود - كمون - نتفة ملح ) > اختياري
🥪
⦁ نقطع البيض مكعبات بس ننتبه ماتنهرس معانا
⦁ في صحن عميق نخلط الجبنة والطحينة والصويا و دبس الرمان
⦁ نضيف البندورة و الفلفل الأخضر والبقدونس
⦁ نضيف البندورة و الفلفل الأخضر والبقدونس
⦁ ونضيف البهارات ، ونخلطهم تمام التمام
⦁ آخر شيء نضيف البيض ونخلط بهدوووووء حتى ماينهرس ويحافظ على شكلة ..
⦁ نأكل باردة ، ممكن بالتوست المحمّص أو تغميسه بالخبز ، مع شاي منعنع ياااه 🤤
(٤)
❛ توست موز
- حبات توست حسب الحاجة
- موز
- قرفة باودر
- زبدة فول سوداني
- نيوتيلا
🥪
⦁ نحمّص التوست حتي نعطية تكة قرمشة لذيذة
⦁ فهالاثناء نقطع الموز حلقات وسط
⦁ ندهن التوست بزبدة الفول السوداني
⦁ وعلى طرف الملعقة ناخذ نيوتيلا وندهن عالزبدة " بتديلها نكهة لذيذة " 👌🏼
نوزع الموز عالتوست و نرش القرفة ..
⦁ وبالعافية 😋
(٥)
❛ توست باللبنه
- توست محمّص
- بندورة شرايح
- أوراق خس أو جرجير
- لبنة
- زعتر و زيت زيتون
- بقدونس مفروم
🥪
⦁ نخلط اللبنة و البقدونس و رشة زعتر و زيت الزيتون
⦁ نفردها عالتوست مع البندورة والخس
⦁ وبالعافية 😋
وكانت هذي الاربع وصفات السريعة للفطور .. جهزي خطتك الاسبوعية للوجبات واتاكدي من المقادير حتى ماتتوهين ، وجهزيها من الليل ..
وصباحك حلو ولزيز يارب
❤︎
1 comments