كبسولات قهوة ستاربكس | وستاربكس جبتو فبيتك ☕️🤤
صباح / مساء ريحتو قهوة وطاقة حلوه و إيجابية ☕️🍃
⦁
⦁
اتفقنا انو القهوة عند الأغلبية سارت مهمة بعد العدم ، نتاجاً للعولمة والتأثير الجمعي القومي 👌🏼
امممممم 😕
عشان كذا م أحب أكتب تدوينات أيام الدوام تعلق المصطلحات فمخي
* ياريتو بس مصطلحات إلا جميع لهجات الدكتورات تتشعبط فمخي وارجع البيت فيوزي ضاربة لووووول 😅*
إش كنا نقول ؟
إيوا القهوة اتفقنا إنها تقريباً سارت شيء مهم عند أغلبنا بسبب التأثير اللي حوالينا ، شوي شوي لقينا نفسنا مدمنين قهوة واحنا ماكنا نفرق بين الكابتشينو و الموكا 😋
الزبدة
عشان الأهمية هذي أغلبنا سار عندو ركن قهوة فالبيت أو كوفي مشين نسبريسو دولتشي كميكس أو غيرهم
مع إني مو من مهووسين القهوة بس مدمنه نسبياً واعتبرها شيء أساسي فيومي ولو ماشربتها أحس بوه شيء ناقص
< كل هذا و مو مهووسه 😝
فـَ سبق كتبت بوست عن ركن قهوتي " كنت مدمنة عالفرنسي قبل اشتري النسبريسو " كلها يدوية تعتمد عالبُن ولذيذة :)
و بعدها اشتريت نسبريسو كوفي مشين ، وكتبت تدوينة عنها كمان ، هل هي مهمة ومحرزه ؟ وإلا فتيت فلوسي عالفاضي ؟
يتضح من تدوينة اليوم إني قاعدة أجرب لسى وافتش عن القهوة اللذيذة اللي تنخر فالمخ
من ضمن تجاربي الجميلة هي مجموعة كبسولات القهوة من ستاربكس ..
منها ستة أنواع مختلفة ، كل علبة فيها عشر كبسولات = ٣٥ ريال
☕️
HOUSE blend ❞
⦁ تحميص وسط
⦁ مذاقها غني ، حسب وصفهم نكهتها جوز و كاكاو و شواء ..
💬 عجبتني نكهتها واتميزت عندي من بين الأنواع مع إني م افرق بس فعلاً طِعمه ، و عادي اشربها بدون حليب مو حادة أو مُره تسلخ الحلق ..
# أغلب اللي تحميصتهم ميديم تكون لذيذة .
☕️
DECAF ESPRESSO ROST ❝
&
ESPRESSO ROST ❞
⦁ تحميص قوي
⦁ داكنه ، و مكرمله ، مناسبة لتحضير اللاتيه والكابتشينو ..
💬 فعلاً النكهات الحادة بالتحميص ماتروقلي بالشرب مراره على طعم مقشعر غريب ، فاستخدمهم في القهوة الباردة ووصفات المشروبات ، وتكون خيار مناسب فعلاً ..
لكن ما اعتقد راح ارجع اشتريها ، نسكافيه بمويا تأدي الغرض 😁
# كلهم نفس النكهة بس ديكاف بدون كافيين .
☕️
COLOMBIA ❝
⦁ تحميص متوسط
⦁ مميزة ومتوازنة ، وصفها عبيط للأمانه
💬 بس من الانواع المش بطالة ، طالما انها تحميص ميديم فنكهتها موزونه وتنشرب بدون حليب ..
☕️
KENYA ❞
⦁ تحميص متوسط
⦁ نكهتها حمضيه حسب وصفهم ، وتبرز كل مابردت القهوة ، تحتوي على الجريب فروت .
💬 زي صديقاتها ماتفرق كثير ، بس فعلاً نكهتها بارده ألذ > باردة انو اتمطع وانا اشربها حتى تبرد مو احط فيها ثلج وكذا 😁
☕️
ESPRESSO ROAST ❝
⦁ خفيفة و حُلوة
💬 خفيفه جداً ، أحب السويتي ، بس مو مميزة
ماعتقد بارجع اشتريها
# كل الدارك واللايت مابرجع اشتريهم ، الميديم هم اللي يعطونك إحساس القهوة المتوازنة واللذيذة ..
☕️
طيب اللي ماعندو نسبريسو أو فالسفر إش يسوي 🤔 فيه حل ألذ 🤤
❝ الأظرف سريعة التحضير 🤩
ثلاث أنواع من القهوة في أظرف تكفي كوب واحد ، كل علبة فيها ١٢ ظرف = ٤٠ ريال
يضاف لها ١٨٠ مل ماء ساخن ، ماعجبتني بالمويا فاستبدلتو بالحليب وكان خنفشااااري
* أقولكم سر ؟ اطعم و ألذ من الكبسولات بمرااااحل 🙊
☕️
ITALIAN ❞
⦁ تحميص قوي ، مشوية و جافة ..
💬 نكهتها غريبة طعم قهوة طعم بُن واضح بس بهدوء ، ماعرفت اوصفها بس جداً لذيذة ..
☕️
ITALIAN DECAF ❞
⦁ تحميص قوي
💬 أكثر وحدة عجبتني بينهم ، نفس النوع الأول لكن بدون كافيين ، أول وحدة خلصتها وأول وحدة بارجع اشتريها .
☕️
COLOMBIA ❝
⦁ تحميص وسط
💬 كمان لذيذة درجة المرارة فيها مو مزعجة ، بس حادة نتفه ، لكن حتى حدتها لذيذة
☕️
النكهات و الروائح مستحيل تفهمها بلا ما تذوق وتشم بنفسك
التنويع والتجربة حلوين ، ماراح تميّز الأنواع بلا ماتجرب المحمص جداً و متوسط و شوية ، باردة و حارة ، بمويا أو بحليب ، مع إضافات أو بدون ..
حتى و إن كنت مرتاح على القهوة التركية جرب مره الفرنسي ، جرب الاثيوبي و الأوغندي ، جرب وجرب وجرب في اوقات مختلفة وبطرق مختلفة ، حيجي يوم تحب اللي ماكنت تستسيغه !
كنت استغرب كيف البعض يشرب القهوة التركية ! مع الأيام سرت اشربها بالحليب ، بعد فترة لقيتني اشربها عادية بالمويا ، ومتأكدة حيجي يوم اشربها بدون سكر ..
فقط جربت كثير وزاد تقبلي و اتوسعت خياراتي
والحياة مع الخيارات الكثير أسهل وأحلى و أكثر حرية # قناعة .. 📍
☕️
📌 الكبسولات من متجر
على تويتر و انستاقرام ..
عندهم أكواب حافظة للحرارة و أكواب للمشروبات الباردة و أكواب قهوة متنوعة ونكهات قهوة و بُن ستاربكس .. لطيفين بالتعامل جداً
باستعرض لكم يوماً ما أكوابي من عندهم بمشيئة الله :)
☕️
" دمتم بِـ سعادة "
❤︎
8 comments