ربوعيتنا

التطوير الشخصي

صحة و رياضة

ثَرثَرةْ | [ معوّض خير ] الحكمة ببعض أبيات ♣

by - 8:39 PM


" السلام عليكم ورحمة الله وبركاته "

صباحِك / مساءِك جميل 






تدوينة بسيطة سريعة ، مشغولة بالإختبارات لكن عشان ماتطول الغيبة :)



بعض القصائد رنّانة لدرجة ودك تكتب بماء الذهب والله ..

في قصيدة أنشدها محمد العبدالله ، سمعتها  وشبكت معي ، صدق صدق راقت لي
في كل بيت منها نصيحة عميقة ، محظوظة لو سمعتيها و استوعبتيها ، صحيح إنها موجهه للرجال ، لكن تبقى عظيمة ؛ تحسينها تنمْ عن شخصيه رزينة عاقلة لأبعد الحدود .

المكمّل لجمالها اللحن ، هادي جداً يعطيك مجال تتأملين الكلمات وتاخذين المعنى ، ما اضافوا أي مؤثرات أو اصوات خارجية إلّا يادوب شوي بالخلفية
اكتفوا بصوت المنشد بارز ، اللي اقدر اقول إنه كفّى ووفّى ..





[ معوّض خير ]

للشاعر : عبدالله الطلحي الهذلي 

~ باقتبس بعض من الأبيات اللي أعجبتني ، لو حبيتيها تقدرين تطلعين عليها ، و باحط مقطع القصيدة نهاية البوست .

معوّض خير ياحيٍ تهقوى في الزمـان ومـال
    سنينك لو رقيـت بعدلهـا يطرحـك مايلهـا

تعلّم واعرف إن الدرب قدامك سهـل وجبـال
جبـال تطولهـا وجبـال بعيونـك تخايلـهـا


وقوفك عند راس البير مايسقيك لـو فنجـال
ولاينفعك شوف الجمـه اللـي منـت طايلهـا



ومعوّض خير ياحيٍ خدعك من الرجال أشكـال

تشوف أشكالها وتحطها أرفـع مـن منازلهـا



تعلّم من زمانك لاتصير مـن أجهـل الجهـال
ترى في كل يـوم تجيـك عبـره لاتجاهلهـا



معاريف الرجال ديون وديون الرجـال ثقـال
ليا أصبحت متعافي فلا تغـرق جمايلهـا

رصيدك في حياتك سمعتك مع طيبيـن الفـال
رجال الطيب والمعروف بالمعـروف عاملهـا



وخذ منـي نصيحـه لاتصـدق كـل ماينقـال
يجـرك للنميمـه ليـن يطرحـك بحبايلها

يجيلك ناقـل النمّـات بهـروجٍ تغـث البـال
سوالف في قفاك وحظك أطيب يـوم تجهلهـا


ترى من جاب لك ودّى وهذي عـادة  النقـال
يحاول يقتنص من فمك كلمـه لأجـل ينقلهـا

ومثل ماقال عندك راح عنك وعند غيرك قـال
وزوّد عشر فوق الكلمه اللـي كنـت قايلهـا

وبنتك لاتزوجها الردي لو هـو كثيـر المـال
تربيهـا علـى الطـالات وتشـوّه سلايلهـا

نصيحة واحدٍ جرّب وشاف من الزمان اهـوال
يقدّم لـك خلاصـة هجـرةٍ جـرّب هوايلهـا


! الحياة سهالات و صعوبات ، حاجات تعدي سلسة وحاجات صعبة بس ممكنة وحاجات مستحيلة ؛ آمن بهذا الشيء ولا ترفع سقف توقعاتك حتى لايجي يوم وتنهار .


!! نصف الإجتهاد ماينفعك و الوقوف والإكتفاء بالنظر مايحرّك ساكن ؛ تحرّك و اعمل واطلب رزقك بنفسك لاتنتظر شيء يجيلك بدون تعب .

!!! من كل موقف يحصل لك أو يحصل قدامك خذ عبرة ، يومياً آلاف العبر تمر عندك ركّز عليها ولاتفوتها .

!!!! طالما إنت بصحة وعافية إعتمد على نفسك ولاتتحمّل جمايل ناس طالما إنك قادر ، لا تحط نفسك في مآزق ومواقف محرجة مع الزمن .

!!!!! سمعتك ألزم ماعليك ، الناس ماتنسى ، لاتغلط غلطات بعمرك تبقى لاصقه فيك ماحييت ، ربنا يغفر ويرحم بس الناس ماترحم .

!!!!!! شيء ماشفته بعينك ولا سمعته باذنك لاتصدقه ، تهتمّ ( يصيبك الهم ) على حاجات كنت أحسن لو مادريت عنها ، واللي ينقل لك هرج بينقل هرجك ، حتى إنه بيزيد عليه .

!!!!!!! وبنتك لاتزوجها الغني عديم الأخلاق ، تربي بنتك أحسن تربية لكن تشوّه ذريتها .

!!!!!!!! 
هذا بعض اللي طلع معي من مفاهيم لبعض الأبيات ، ومتأكدة إنها أعمق من كذا بكثييير




دمتم بسعادة 





You May Also Like

0 comments