ثَرثَرةْ | أدبي ؟ ولا علمي ؟ ♣
" السلام عليكم ورحمة الله وبركاته "
صباحِك / مساءِك توفيق
من أكثر الحاجات الي تغبّني في المجتمع ونفسي أغيرها " نظرتهم للعلمي و الأدبي "
إنتِ أدبي إذاً أنتِ : لعّابة - مهملة - مشاغبة !
إنتِ علمي إذاً أنتِ : دافورة ومجتهدة - مؤدبة وخلوقة - حرام مكروفة لين طالعة روحك !!!
* إذا ماحولك ناس بهذي النظرة فأنتِ محظوظة .
صدمة السنة لما أول يوم في ثاني ثانوي كل ابلا تدخل تطالع بتعجّب
حنيييين ليش داخله أدبي حرام أنت شاطرة ؟
صار هالموقف مع كثير صديقاتي ، حتى إنو وحدة منهم عائلتها أكلتها بقشورها كيف أنت أدبي
وبنت عمتك البليدة علمي ؟
العنصريّة حتى عند المعلمات ، اتذكر معلمة لمادة مشتركة بيننا طلبت منّا مشروع " هايل "
مقابل إنو مشروعهم كان بسسيط جداً ، لما اعترضنا قالت والله إنتوا ادبي وفاضيات ، لكن هما علمي مكروفات !
عييب والله عيب وحرام كلنا نداوم وندرس ونختبر وعندنا واجبات ومشاريع وملفات وشغل
*ضحّكتني هالصورة "لوووووول" مع إنها تقهر :|
كأن الموضوع إنقلب حلطمة ؟
كأن الموضوع إنقلب حلطمة ؟
- مو هذي هرجتنا ، الإختيار بين العلمي و الادبي شيء مُحيّر جداً ، ومصيري جداً عشان كذا باذكر تجربتي ويارب
افيدك لو بشيء بسيط ..
~ بشكل عام :
في أول مرحلة في الثانوي بتدرسين جميع المواد ( العربي - الدين - الانقلش - علم نفس - الرياضيات - الفيزياء - الكيمياء - الأحياء - التربية الأسرية ... )
هالمرحلة بتكون ثقيلة نوعاً ما ، مواد طبيعتها جديدة + جداً كثيرة ، وغالباً المعدل ينزل عن المعتاد " طبيعي جداً " ، نهاية السنة تختارين بين العلمي أو الأدبي ( شرعي - طبيعي ) تكملين السنتين الجاية فيه ، ويأثر كمان على تخصصك الجامعي ، وبالتالي على وظيفتك .
يعني الإختيار لازم يكون دقيق جداً لأن تترتب عليه أمور مستقبليّه كثيرة .
~ الأدبي :
هالقسم مواده نظرية ، يعني مجرد إطلاع و حفظ ، ماعدا الإنقلش فهم وحفظ .
* المواد :
- الدين عند القسمين نفس الشيء
- العربي حالياً للنظام الفصلي مواد منفصلة ( أدب ، بلاغة ، نحو ، مكتبة ، تعبير ... ) ، ولنظام المقررات كفايات لغوية كتاب واحد لجميع المواد .
- الإجتماعيات تاريخ و جغرافيا .
- علم النفس و علم الإجتماع .
- الإقتصاد المنزلي أو التربية الأسرية نفسها عند القسمين .
- الإنقلش نفسه عند القسمين .
~ العلمي :
أما هالقسم مواده عمليّة ، يعني حفظ و فهم ، والفهم أكثر .
* المواد :
- الدين .
- العربي ( المواد الأساسيّة فقط ومخففة كمان ، نحو و أدب و بلاغة ) .
- الإنقلش .
- الرياضيات
- كيمياء .
- فيزياء .
- أحياء .
إقتصاد منزلي أو تربية أسرية .
~ راعي هالنقاط عند الإختيار #
١ إعتمدي على قرارك وميولك الشخصي ، لاتختارين لأن صحباتك اختاروا ولا عشان معلمة تحبينها ، رأيك إنتِ
٢ من خلال دراستك للمواد في السنة الأولى فين حسيتي الصعوبة كانت في المواد العلمية أو الأدبية ؟ وأي الدرجات اعلى ؟
٣ بالنسبة لك أي المواد تستمتعين بدراستها ؟ وتفضلينها بشكل عام ؟ ؛ ممكن تقلبين المقارنة وتخلينها أي المواد ما تفضلينها وماتستمتعين بدراستها ؟
٤ مبدئياً إش حابة تتخصصين بالجامعة ؟ هالنقطة جداً جداً مهمة مو شرط تكونين محددة بالزبط بس خياراتك الأولى تقبل أي القسمين ؟
٥ نوع دراستك بالغالب حفظ ولا فهم ؟ يعني لو عندك نص شعري تحفظينه بنص ساعة ولا بثلاث ساعات ؟ إذا ذاكرتي مادة علميّة غالباً تلاقين صعوبة بالفهم وتطبيق الأمثلة ولا سهل مجرد تفهمين المسأله الأولى تطبقين على الباقي ؟
٦ استشيري ؛ أهلك و الناس القريبة جداً منك ، لكن لاتخلين رأيهم أساسي في إختيارك ، فقط للدعم لأن التجارب تختلف .
٧ استخيري وشوفي ربي إش ييسر لك .
٨ لو كنتي حاسة إن ماعندك مشكلة مع الحفظ و الفهم وعادي تمشين في الإثنين برأيي إختاري علمي ، ليش ؟
بالجامعة بعض التخصصات متاحة للعلمي و الأدبي فتدرسين مواد علمية زي الرياضيات والإحصاء والمحاسبة والتمويل وغالباً تشمل دروس الثانوي .
# نقطة مهمة جداً : لاتخلين نظرة المجتمع تأثر على قرارك ، حتى لو دخلت علمي علشان الناس إنت اللي بتفحطين بالدراسة وبتاكلين هوا علشان ترفعين نسبتك ، نكون واقعيين شوي العلمي يبغاله تكة إجتهاد أكثر من الأدبي ، لكن لو أصلاً مو ميولك ودخلتيه بتتعبين كثييييير وصدقيني بتندمين .
لو دخلتِ أدبي لاتخجلين من نفسك ، وقولي أنا أدبي وإنت رافعة راسك ، اللي يحسب الأدبي سهل غلطاااااااان وماجرّبه ؛ النحو والإعراب مو سهل ، التاريخ والجغرافيا لو الناس تشوفها سخيفه ماهي هينه بالدراسة والإختبار ، علم النفس والإجتماع كانت منقّزه عيوننا لأنها دش دش مو واضحة ، مو المقصد الترهيب والتخويف لكن لاتفكرين تدخلين أدبي لأنك تظنين إنه سهل .
# تذكري دايماً ٩٥٪ وفوق في الأدبي أفضل من ٩٠٪ في العلمي ؛ بالجامعة بيسألونك عن نسبتك بالأول مو عن تخصصك .
~ لي قريبة كانت أدبي وبنات خالاتها علمي ، لما يسألونها إش اخترتي ؟ تقول أدبي تنقلب النظرات إلى إستحقار وإنو نحنا علمي واااو ، العبرة في الآخر كلهم معدلاتهم مادخلتهم الجامعة وبعضهم تخصصاتهم تمشية حال ، وهي تبارك الله إنقبلت بأول دفعة وتخصص الكل يتمناه .
لو عندك أي استفسار او تساؤل روحي لمرشدتك أو إدارة مدرستك ، أو أي معلمة متعاونة .
لو حابة تطلعين على التخصصات الجامعية وتعرفين إي قسم تقبل ادخلي موقع الجامعة الي حابة تلتحقين فيها
وبتلاقين التقسيم المتاح موجود ؛ أو راسلي حسابهم الخاص على تويتر .
موفّقه ❤
55 comments