ثَرثَرةْ | القدرات + التحصيلي فرصتك المصيرية لمستقبلك الدراسي ♣
صباحِك / مساءِك توفيق
إختبار القدرات والتحصيلي من أهم اللحظات الحاسمة في حياتك الدراسية ، ممكن في هالإختبار بتوفيق الله يرتفع معدلك التراكمي بشكل خيالي ، وممكن لاقدر الله ينخسف ويضيع جزء كبير من تعبك وكفاحك طول سنواتك الدراسية ..
* عن إش تتكلمين يا حنين ؟
- بعد إجتياز المرحلة الثانوية يُلزم الطالب الراغب بالإلتحاق بالجامعة إنو يختبر إختبارين [ تحصيلي + قدرات ] وتحسب درجة الإختبارين ضمن نسبة الثانوية ( معدل تراكمي ) يحدد لك ع أساسه أي الأقسام متاحة لك في الجامعة .
صحيح إنو حاجة إجباريّة مو إختياريّة لكن بيدك ترفعينه وبيدك تنزلينه بإذن الله ؛ كيف ؟
~ بدايةً تعريف بسيط عن إختبار القدرات :
- هو إختبار مكوّن من جزأين ( ١/ لفظي ٢/ كمي ) مقسّمه على ستة فصول ، لكل فصل ٢٥ دقيقة تحلين فيها .
~ القسم اللفظي يحتوي على 68 سؤالاً للتخصصات العلمية و 91 سؤال للتخصصات الادبية ، مقسمه على :
١- إستيعاب المقروء ٢- إكمال الجمل ٣- التناظر اللفظي ٤- الخطأ السياقي ٥- المفردة الشاذة .
# مهم جداً تتدربين على الإختبارات وتعرفين آلية حل كل نوع منهم ، إذا عرفتي الطريقة ضمنتي ٩٠٪ من الدرجة بإذن الله ، حصيلتك اللغويّة مهمة جداً جداً هالقسم معتمد عليها بشكل كبيييير .
~ القسم الكمي يحتوي على 52 سؤالا موضوعي للتخصصات العلمية مقسمة على :
40% سؤالاً حسابياً 24% سؤالاً هندسياً 23% سؤالاً جبرياً 13% سؤالاً تحليلياً وإحصائياً .
# الاسئلة رياضيّة عامة ماتتعمق بحيث لو كنتي أدبي ماتحوسين ، لكن بنفس الوقت تحتاج خبرة وشطارة بالحساب .
لو كنتي قدعه بالرياضيات مهم تتدربين عشان ماتاخذ المسأله معك وقت بالاختبار ، ولو كنتي نص ونص أهم وأهم تتدربين بحيث تعرفين الطريقة وياخذ مخك عليها .
~ تعريف بسيط عن إختبار التحصيلي :
- هو إختبار يقيس نسبة تحصيلك من المواد الدراسية خلال دراستك لمرحلة المتوسط والثانوي ، يختلف عن القدرات إن القدرات تقيس الذكاء بصفة عامة ، أما التحصيلي يقيس شطارتك في الدراسة :)
- طريقته نفس القدرات مجموعة من الأسئلة مقسمه على فصول لها وقت محدد للإجابة .
يحق لك التسجيل في الإختبار أكثر من مره ، وتؤخذ لك أعلى درجة منهم .
التسجيل يكون آلي عن طريق الانترنت ( قياس ) قبل فترة الاختبار بثلاث شهور تقريباً ( تبلّغك المدرسة وقتها ) ، لو عندك أي استفسار او ماعرفتي تسجلين روحي للمرشدة أو مسؤولة المصادر في مدرستك وهي راح تتولى التسجيل .
لإنشاء ملف في موقع قياس والتسجيل للإختبارات " إضغطي هنا "
رابط الاسئلة الشائعة عن القدرات في قياس " إضغطي هنا "
رابط الاسئلة الشائعة عن التحصيلي في قياس " إضغطي هنا "
# تقدرين تبحثين في اليوتيوب عن طريقة التسجيل مليان مقاطع مفيدة ..
~ الإستعداد للإختبار :
قبل الإختبار بأطول فترة ممكنة إبدأي اتدربي ، التدريب جداً مهم عشان تتعودين تحلين بأقصر وقت ممكن ، وعشان تعرفين طريقة السؤال و شفرة الحل ( لكل سؤال رابط حل موجود بنفس صيغة السؤال لو عرفتيها بتلاقين الحل قدامك دغري )
* فين ممكن اتدرب ؟
المجالات قدامك كثيرة ، في العبيكان والمكتبات الكبيرة في كتب لنماذج اختبارات مع الأجوبة وطريقة معرفة الجواب ( مفيدة جداً )
- موقع قياس نفسه يوفّر لك اختبارات تجريبية و اختبارات تعليمية ، بتستفيدين كثير لو اطّلعتي عليها .
- في تويتر حسابات تجمّع لك اسئلة من الاختبارات السابقة ، وكثييييير كثييييير تتكرر الأسئلة .
- منصة نون التعليمية توفر لك 60٪ من الجهد ، جداً جداً مفيدة ، لهم موقع هنا وحسابات مواقع التواصل موجودة اسفل الموقع .
- موقع يزيد التعليمي برضو يوفر لك تجميعات لإختبارات سابقة ، هذا رابط القسم الخاص بقياس " إضغطي هنا "
- هذا الرابط جداً مهم تلاقين فيه معلومات مهمة وشاملة عن الإختبار ، ومثال للاسئلة ، ورابط للإختبارات التجريبية " إضغطي هنا "
- اسئلة و أجوبة عامة لكل إختبارات مركز قياس " إضغطي هنا "
- تجربة طالب نتيجتة كانت +90 تبارك الله هنا
- حساب طلال على تويتر مغرد تغريدات متسلسله فيها روابط مهمه لكتب او برامج او مواقع هنا
- حساب طلال على تويتر مغرد تغريدات متسلسله فيها روابط مهمه لكتب او برامج او مواقع هنا
* حاجة ثانية كثير يغفلون عنها وهي من أهم مهمات الإختبار " لووووول "
( التظليل التظليل التظليل )
طبعاً بما ان الأسئلة إختياري من متعدد ، عندك نموذج فيه الاسئلة و نموذج تعبين فيه الإجابات ، كذا شكله : ( مالقيت اوضح منها )
شايفين الدوائر الصغيرة هذي ، ايوا بالزبط لازم تظللينها حبة حبة وبدقققققققة شديدة ، ماهي صعبة إن شاء الله لكن يلزمك تتدربين عشان ماتغلطين وتخرجين برا الدائرة ويروح وقتك بالتمسيح ، و برضو ماتضغطين بقوة وتنشق عليك الورقة ، و لاتخففين مره وماتحسب لك الإجابة ..
دوري في قوقل اي نموذج واضح واطبعيه و اقعدي ظللي عشان لا تتعضّل يدك وقت الإختبار " واضح إني عانيت :( "
~ تجربتي مع الإختبارين و شوية نصائح مهمة :
# لو كنتي مستعجلة انزلي دغري ع النصايح ..
وقت اختباري كان متاح فرصتين للإختبار فقط في ثالث ثانوي ، فـ بدأت بحوسة عويصة في التسجيل ، لأني زي ماذكرت في موضوع المواهب والهوايات كنت قيد اختبرت اختبار موهبة وسجلت في اولمبياد الرياضيات ، وحضرتي نسيت رقم الجوال والبيانات الي كنت مسجلتها ( كان قبل ثلاث سنوات من الإختبار ) ؛ اتوتّرت وخفت مره بحثت في النت مالقيت اي حل وحاولت مع مرشدتي في المدرسة مافي فايدة والوقت يعدي والتسجيل المبكر قفل ، بعد ما يأست فعلاً اقتنعت انو خلاص راحت عليا ، صدفة اتصلت علي صديقه اخر عهدي فيها ثالث متوسط وانقطعنا تماماً ، م اعرف كيف جابت رقمي وسألتني إش سويتي في قياس وقلت لها مشكلتي ، قالت حطي كذا وسوي كذا ويطلع لك الرقم ( كانت معي في اولمبياد الرياضيات ثالث متوسط وسارت لها نفس مشكلتي ) الله يسعدها ربي جابها ليا في أنسب وقت :)
الحمد لله لحقت وسجلت وتمت اموري ، صدقاً ما اهتميت للموضوع من ناحية الاستعداد والمذاكرة ماعرف ليش ماكنت واعية !! حتى المحاضرات الي كانت تسويها المدرسة نشرد منها كل ماسمحت لنا الفرصة ، قبل الاختبار بيوم صحيت ع نفسي واشتريت كتاب القدرات " مره بدري " ذاكرت اربع فصول اتوقع من اصل ١٢ فصل ، والتجميعات قرأتها عن تأنيب الضمير بس .
صباح الاختبار صحيت واتجهزت وقعدت انتظر ابويا ونروح ، لخيرة كتبها الله ( زلق ) او اتزحلق احد افراد الأسرة عالسيراميك وانكسرت رجله ، جا ابويا وبقي ع الاختبار اقل من ساعه الا ربع ، م يعرف يروح للمستشفى ولا يوديني للإختبار ، م احكيكم كمية التوتر والخوف الي جاني ، صديقتي سبقتني للجامعة وسارت تدق تقول يلا بدأوا يصفوننا طوابير لدخول الاختبار ، قررنا نلحق عالاختبار وبعدها يروحون المستشفى وجيت بالوقت الضايع ، من التوتر دخلت في طابور غلط لأن المفروض يرسلون لي ليلة الاختبار رقم المجموعة والصف والعامود ورقم مقعدي ، وماجاتني الرسالة فقالت لي المسؤولة اروح ادور اسمي بالأوراق المعلقه عالجدار ، لقيت اسمي ورجعتلها قلت لها رقمي ٨ وطبعاً انعميت وقتها لأن رقمي الأصلي ٢ ، و رحت للقاعة الغلط وسألتني المسؤولة عن اسمي ذكرت لها اسمي واسم ابويا قالت مقعدك هذا وجلست فيه ، بعد شوي جات بنت قالت هذا مقعدي !! يالهوي ناقصه عويصه انا ؟ جات المشرفة لقيت ان البنت نفس اسمي واسم ابويا والمقعد لها ، انا هنا جاتني الصيحة خلاص مشاعري ضربت خوف ع توتر ع حزن م اعرف ، خرجت رحت لأقرب مسؤولة لقيت عندها كومة بنات نفس حالتي ، الله يسعدها داخت معانا ع بال مالقيت كل بنت قاعتها ، طبعاً كانوا قد بدأوا وزعوا الاوراق لتعبية البيانات الأولية وراحت نص التعليمات والملاحظات ..
جلست بمقعدي و " اتنفست الصعداء " ، قعدت اهدّي نفسي ، خلاص ياحنو انتهينا لقينا المقعد الصح وقفي توتر ورجفة ، التعليمات كنت قرأتها بالنت قبل ، استرخيت وطلبت مويا ، واخذت ورقة البيانات وطلبت من المسؤولة عن صفي تظلل بياناتي عني لاني مو قادرة من الرجفة ، جو القاعة كان بااااااارد صقيع سرت انتفض توتر وبرد " حالتي مزريه " ، سميت بالله وبدأت الإختبار ومابغيت ..
الحمد لله كنت اخلص حل اسئلة القسم واراجعها واظلل ولسى باقي وقت ( يعرض ع الداتاشو ساعة كبيرة عشان تعرفين الوقت ) ، ارتحت الحمد لله وكملنا الإختبار ، خلصت وخرجت كأني خارجة من معركة مو اختبار .
بعد ثلاث اسابيع إلى شهر تطلع نتائج الإختبار ، م تصدقون المفاجأة صحيت من النوم شفت الرسالة من قياس نقزت من السرير مو مصدقة عيوني ، ياربي لك الحمد درجتي كانت عالية عالية تبيّض الوجه ، دمعت من الفرحه مو مصدقه دخلت على ملفي في قياس لقيت فعلاً الدرجة نفسها ، م سجلت في الفرصة الثانية لأني " توّبت " لوووول
لا لا امزح ، بس لأن م حسيت اني احتاج فرصة ثانية ، عجبتني درجتي الحمد لله .
في التحصيلي كنت اخذت " علقة " محترمة ، فـ رحت قبل الموعد بساعة ونص وشيكت ع ارقامي وبياناتي وصورتها بالجوال وكتبتها بورقة مع البطاقة ، لبست لبس مريح ودافي وتمت الأمور بكل سلاسة الحمد لله .
# الي استفدته من تجربتي كاملة للإختبارين باكتبها ع شكل توصيات مرقمة ، اعتبريها لُب و زبدة الموضوع كامل :
١ تابعي الموقع و أول مايفتح التسجيل سجلي ، لو عكّ معك أي شيء راجعي مدرستك ، لو مالقيتي حل اتصلي بالرقم الموجود في موقع قياس تحت في الفوتر [ وللاستفسارات يمكنك الاتصال على مركز المكالمات على الهاتف الموحد 920033555 ] .
٢ احفظي موعدك واطبعي صفحة بياناتك وحطيها بمكان معروف ، وحطي تذكير بجوالك قبل موعد الإختبار ( كثير بنات كانوا ملخبطين في مواعيد اختباراتهم او اماكنها ، فخليك مركزة انتِ صباح ولا مساء ، وفين بالزبط ) واتاكدي انك دفعتي الرسوم واخذتي ايصال عليه واحتفظي فيه .
٣ ذاكري ذاكري ذاكري ، لاتسوين زيي ؛ الحمد لله م جات ع راصي لكن اعترف كان اهمال ممكن يضيعني ، اشتري الكتب من بدري ، فصفصي النت فصفصه لاتهملين اي معلومة ، احضري المحاضرات التدريبية ؛ اشوف بعض بنات يروحون لاستاذات خصوصيات " ولو إني احس مايحتاج " لكن لو حسيتي انك تحتاجين ليش لا .
٤ راح تحدد لك المدرسة يوم يجون فيه مسؤولين من قياس يطلعون لكم البطاقات الخاصة بالدخول ، لاتغيبين ذاك اليوم ، ولو حصل ظرف و ماقدرتي روحي لهم المركز وطلعيها ع طول لا تماطلين .
٥ قبل الإختبار جهزي اغراضك ، خذي شنطة تشيل عبايتك واغراضك ، اتاكدي من متطلبات الدخول ( راح يذكرها لك لما تسجلين ) ، مناديل و مويا و سناك خفيف ، بنادول لو صدعتي او عورتك بطنك من التوتر ذذذذذ .
٦ اتكشخي وخذي راحتك لكن احرصي يكون لبسك مو مخالف ( ساتر ) ، ويدفي اهم شيء ، ومريييييح الزم ماعليك راحتك ، لاتخلين شيء يشتت تركيزك ، حاولي ما تفكين شعرك ولا تلبسين اكسسوارات من العيار الثقيل .
٧ اتوكلي ع الله ، اتفاءلي ، وادعي ادعي ادعي ، مهما تتعقد معك بالدعاء كل شيء يتيسر بمشيئة الله .
٨ روحي قبل موعد اختبارك بوقت كافي ، حطي في بالك اي شيء ممكن يأخرك ، تعطل سيارة ، عزقة سير ، لخبطة في التنظيم او في بياناتك .
٩ خليك ريلااااكس مافي شيء يخوّف ، خذي راحتك بالأجوبة ؛ سؤال ضامنة اجابتة ولا عشرة حادي بادي ، و استودعي الله اجاباتك .
١٠ لو نتيجتك ماكانت كويسه لاتزعلين وتتحطمين لسى عندك فرص كمان تشدين حيلك وتزبط إن شاء الله ؛ ولو كانت درجتك كويسه مايخالف جربي كمان ماتدرين ممكن برضو تجيبين اعلى ، صح اني ماطبقت هالنقطة لكن م اخفيك جاني شوية ندم ، اعرف ناس زيي و تبارك الله جابوا نسبة عالية عالية هذيك حقت العباقرة عرفتوها ؟
~ تكنيكات ممكن تفيدك لو احترتي بالجواب :
- اول اجابه : لما تقرأين السؤال وتطري ع بالك الاجابة ، او اول جواب تروح له عينك خليه هو الخيار المبدأي ، غالباً يكون هو الصحيح .
- الاستبعاد : لو ماعرفتي الإجابة الدقيقة ابدأي استبعدي الزجوبة الي ماتتوقعينها صحيحة بتزيد عندك فرصة اختيار الحل الصحيح .
- استعملي الفلسفة والذكاء ، عادي اربطي روابط سامجة بين السؤال والجواب ، اوقات الرابط فعلاً يكون شيء غبي جداً .
- لا تنفجعين لو شفتي اسئلة عبيطة ، لأن بجد بتلقين اسئلة تضحك ماتدرين وين عقل الي كتبها ، وسمعت والعهدة ع الراوي انو في كل فصل سؤال على الأقل ماله أي جواب صحيح .
- لا تستعجلين بالإجابة لأن لكل سؤال جواب صحيح و جواب أصح ، وسمي قبل تختارين الخيار النهائي .
انطباعي النهائي حسيت ان الناس مكبرة الموضوع ومهوّلته زيادة عن اللزوم ، كان الموضوع جداً عادي ( باستثناء الاكشن الي صار لي ) لكن عموم الإختبار ماكان زي ماتوقعت ابداً ، ولصديقاتي نفس الرأي كان بسيط وخفيف .
بالنهاية المسألة كلها توفيق من ربي ، اجتهادك من بذل الأسباب ، يارب اكون افدتك :)
دمتم بتوفيق ❤
1 comments