ربوعيتنا

التطوير الشخصي

صحة و رياضة

ثَرثَرةْ | الإختبارات ♣ نصائح + طريقتي في المذاكرة

by - 2:32 AM


" السلام عليكم ورحمة الله وبركاته "

صباحِك / مساءِك توفيق






من منطلق إحدى عاداتي و طقوسي الّلي هيّا ~ قبل كل إختبارات أحب أبحث عن نصايح و كتابات محفّزه للمذاكرة و شدّة الحيل حتى تعطيني حافز وطاقة أشد " لان بجد آخر التيرم تكون الطاقة صفّرت خلاص والمعنويات في الأرض فاحتاج دفعة معنوية "يا الله قد إش اقـدّر الناس الي تكتب بوستات إنستقرام و تويتات جميلة ، مايعرفون إلى أي درجة هما يفيدوني ، مرات أصوّر بعضها وارجع اقراه كل ماحسيت إني بحاجته . * و بما إنو بقي ع الإختبارات شهر تقريباً حبيت اكتب هالتدوينة اتمنى بجد تفيد لو إنسان واحد يشبهني ويحتاج كلام محفز ..





عبارة كُتبت في مكتبة جامعة هارفارد :

" ألم الدراسة لحظة ، ولكن ألم عدمها يستمر مدى الحياة " 


هذي الجملة حطيها قدام عينك ورسّخيها في بالك ، حتى لو وصل إنك تخلينها خلفية اجهزتك فترة الإختبارات ، فادتني كثير وتذكرني دايماً إنها لحظات راح تعدّي لكنها مصيريه .


* بالنسبة للنصايح فهي ع أقسام ..

(١) قبل الإختبارات ~ جدول المذاكرة - الروتين اليومي - اثناء المذاكرة - طريقة المذاكرة
(٢) وقت الإختبارات ~ المراجعة - اثناء الإختبار - نصايح عشوائية


~ قبل الإختبارات :

~ قبل الإختبارات بفترة - من اسبوع إلى شهر حسب احتياجك - اعلني حالة الخطر وابدأي بتنسيق جدول تختمين فيه المواد ، راعي في الجدول هالشغلات :

- لاتختمين مادة كاملة بيوم واحد ( حتى لو هي قليلة ) قسميها ع يومين فاكثر .
- لاتخلين الجدول مضغوط لأنك راح تتعبين وممكن م تلتزمين ، وطالما معك سعة من الوقت خذي راحتك .
- ابدأي بالمواد الدسمة والغير سهلة ، وخلي معاها مادة سهلة .
- نوّعي في المواد ، يعني لاتحطين مادتين ادبية أو مادتين علمية مع بعض .

~ في هالفترة اعملي روتين يومي ، وراعي فيه هالشغلات :

- خذي كفايتك من النوم ، لاتبدأين المذاكرة و فيك نوم خليك مصحصحه .
- اصحي مع العصافير ، و افطري مزبوط ، واستغلي نشاط الصبحية وهدوء الأجواء .
- اتبعي قاعدة ( ٥٠\١٠ ) وهي إنك تقسمين وقتك كل قسم لـِ ٥٠ دقيقة مذاكرة و ١٠ دقايق حرّه ، كلي ، ارقصي ، غني ، بس لاتفتحين الجوال :(
بجد هالقاعدة خلتني انجز بشكل كبير في حياتي ( اتبعها في اغلب الشغلات مو بس المذاكرة ) .
- قسمي المادة الي بيدك إلى فصول ، بعد ماتخلصين كل فصل كافئي نفسك بشغلة : خذي بريك ساعة ، اقعدي عالنت ، اقعدي مع الأهل ...

~ اثناء المذاكرة راعي هالشغلات :

- لاتذاكرين في غرفة نومك ، ( أنا في هالفترة استحل قسم الضيوف أحس بالتجديد مو متعودة اجلس فيه .
- خلي التكييف معتدل ، والبسي لبس مريح ، وارفعي شعراتك ؛ لاتخلين حاجة تشوش مزاجك وتقلق تركيزك .
- ابعدي عن الأصوات والتلفزيون ، وقفلي الواي فاي ، ولاتاكلين اثناء المذاكرة " صدقاً عجزت اسيب هالعادة :| "

* حاجة إضافية آحب اسويها ( ارتب شعري و اتمكيج عالخفيف واتعطر ) مادري اش الرابط لكن تفتح نفسي :)


طريقتي في المذاكرة :

حاجة مهمة قبل اقولك الطريقة ، بالنسبة لأيام المدرسة مذاكرتي للفاينل كانت ساعين ومقطعه كمان " جد والله امي كانت تتجنن مني ادخل الغرفة واطلع اقول خلصت " يابنت كتاب كامل كيف خلصتيه !! لكن فعلياً هذا الي حاصل ، والي ريّحها إنو فعلاً درجاتي كانت مرتفعة جداً الحمد لله ؛ طيب كيف ؟!

١ اركز مع الابلا بالحصة م انشغل ابداً ، فأفهم  وأسأل بلحظتها عن الي م فهمته .
٢ احل الواجب بنفس الحصه واحفظه لو كان مقالي ، و العملي اعتبره تدريب واختبار صغير لفهمي .
٣ الهايلايتر ، هذا بوسه ع جبين مخترعه ، اثناء الشرح احدد على التعريفات والتعاليل والتعدادات واكتب الأسئلة على كل فقرة ، و ١٠٠٪ هي الي تجي في الكويزات او الفاينل .
٤ الإختبارات القصيرة ( الكويزّات ) صح إنها تدبل الكبد طول التيرم لكن تريّح كثير في الفاينل ، تعتبر مراجعة فقط ، برضو تكونين فاهمة اسئلتها كيف صيغتها " خاصةً المواد العلمية ".
٥ بعد كل اختبار علّمي على الأسئلة الي جات بنجمة " غالباً تتكرر الاسئلة " .

في الجامعة تقريباً نفس النقاط لكن صدقاً آخذ بالأيام ١٠ ساعات اذاكر ومرات ادخل الإختبارات سايبة فصل فصلين مامسكتها :( ، خاصةً انو مافي وقت للتختيم والمناهج طويلة .



~ هذي كانت طول التيرم ، طيب وقت الإختبارات ؟

- لو كنتي مذاكرة الجزئيات الأولى ( في كويزات أو ميدات ) ابدأي من الأخير ، ويوم الإختبار راجعي الفصول الأولى .
- خلي معك دفتر و اقلام ملونة ، فرغي التعاريف بورقة ، والمصطلحات الأجنبية بورقة ، والقوانين ، ولو فيه اشياء مهمه أو تحديد برضو خليه بورق خارجي .
- المواد الي فيها رسمات أو جداول قصيها ودبسيها ببعض .
- البداية الفعلية اقرأي بتركيز كل الكلام المكتوب ، وبالمرسام خططي ع مواضع الأسئلة ( تخمين ) وهالشيء لو كنتي ذكية بيطلع لك اسئلة مهمة كثير ( بالخصوص للاستاذات الي يحبون ينقشون الأسئلة من بين السطور ) حددي الجمل الي تجي اختياري ، والي فراغات والي تعداد والي اشرحي ، واكتبي فوق كل فقرة سؤالها .

~ يوم الإختبار بتكونين شبه مذاكرة المادة بس شوي مراجعة ، طيب كيف اراجع ؟

- اصحي بوقت بكير ، وخلصي أمورك ( بالنسبة لي أحب أبدأ اذاكر بعد م اجهز لبسي و شنطتي واتروش و اخلص شغل البيت عشان اصفي مخي وما ألاقي مهرب من المذاكرة ) .
- ابدأي ذاكري الّي محدد بالهايلايت ( زبدة الكلام ) وركزي ع مواضع الأسئلة والي علّمتي عليها .
- اسئلة الواجبات + اسئلة نهاية الفصول مهمة راجعيها مزبوط .
- الورق الي كتبتيه ( المصطلحات والتعاريف ...) راجعيهم لحالهم ، وبعدها الجداول والرسمات .

وبكذا تكونين خلصتي مذاكرة ومراجعة بإذن الله :)

~ اثناء الإختبار :

- سمِ بالله ، واكتبي بياناتك كاملة .
- لو حبيتي إبدأي من الأسئلة الأخيرة ( يجيني نوع من الإطمئنان كذا لوووول ) لأن غالباً الأصعب تكون اخيراً .
- حلي الأسئلة الي متأكدة منها ، وبالخفيف حلي الي شاكة فيها ، وعلّمي عليها .
- السؤال الي ماتعرفين له اكتبي اي شي فيه ، مرات كثير يحسبون درجته ، وكثير بالصدفه يكون الجواب صح ؛ لو السؤال مقالي اكتبي كل الي تعرفينه ومتذكرته عن جزئية السؤال .
- إتأكدي من حل كل الأسئلة ، ولاتحطين اجابتين لنفس السؤال .


~ بس لسى م خلصنا !

فيه تنبيهات عشوائية مهمة جداً #

- درجاتك محسوبة من بداية التيرم ، الإجتهاد مو بس وقت الإمتحانات ، انتبهي لغياباتك ، ومشاركتك وواجبات .
- خليك ذكية المواد السهلة الناس تتهاون فيها وماتذاكرها مزبوط ، نفس الشيء ع آخر المواد تكون الطاقة خلصت ، إصحك تهمليها .
- الإختبارات مو عائق عن الكشخة ابداً ( كثير بنات تجي شادة شعرها ومو حاطه نقطة مكياج كأنها مريضة لها شهر ) لا ي روحي زبطي شعرك و وجهك والبسي حاجة حلوة .
- لا تقلقين وتتوترين ابداً ماله داعي ، طول السنة و احنا نختبر مافرقت ابد ، عادي ع آخر الوقت تحسين المعلومات طارت لكن اتأكدي انو مجرد إحساس .
- لاتراجعين قبل الإختبار بساعتين ع الأقل لأنك بتشتتين مخك ( وبعععععدي عن الي تسألك في آخر لحظة التعريف الفلاني ايش ؟ أو ترا هالشيء مهم ) .
- افطري ، اقري اذكارك ، اتوكلي ع ربك و اطلبي من اهلك يدعولك ، وخليك ريلااااكس .
# لاتدخلين الإختبار إلا وكل اشيائك معك ، الآله الحاسبة مرسامك قلمك مناديل و مويا وساعتك ، وبطاقتك لو كنتي جامعية .


* ادعي ربي دايماً يوفقك ، ولاتغشين حتى لو جاتك الفرصة لحدك ، و استودعي الله اجاباتك ودرجاتك .

* لا تحسدين صديقاتك الفايدة ، لو طلبت منك زميلة حل سؤال أو تحديد أو أي شيء اعطيها واحتسبي الأجر ( معاناة البنات ، مع الأسف ) .

* ممكن تحسين إنو طريقتي فيها شوي ضغط وتعب ، وغالباً م يبقى لي وقت اقعد عالنت أو أرفّه عن نفسي ، لكن مره جميل يكون جو الإختبارات مختلف حتى لما أخلص و أأجز أحس فعلاً بالفرق و فسحة وقت و راحة .

أخيراً : لو كتب ربي ونزلت درجتك في مادة أو أخفقتي لاتزعلين ولا تلومين نفسك ، خلاص إنتي سويتي الي عليك وهذا الي كتبه ربنا ، و ١٠٠٪ هو خير لك .


هذا فيديو ظريف وبنفس الوقت مفيد ، فيه نصائح ممكن تستفيدي منها " ولاتاكلي أثناء المذاكرة لوووول ":






دمتم بـِ توفيق 

تابعوني على :





You May Also Like

8 comments