تربية النفس بالحرمان | تجربة اسبوع بدون كافيين + ومشروبات بديلة ☕️🚫
" السلام عليكم ورحمة الله وبركاته "
صباحِك / مساءِك انجازات
لي تجارب كثيرة في محاولة الامتناع عن الانترنت لـ ٢٤ ساعة فقط ، تخيلوا انها وبكل جهد باءت بالفشل 😓
المره الوحيدة اللي حلفت فيها "حتى ألزم نفسي وغصباً عني امتنع"
لقيتني نمت يوم كامل ، مع الأسف م امزح 💢
لأي درجة ممكن نرتبط بأشياء دخيله على حياتنا ، انولدنا وعشنا سنوات بدونها ، وفي مرحلة نلاقي نفسنا مو قادرين نعيش بدونها ساعات بسيطة !
💬
قرأت قبل اسبوعين سلسلة تغريدات عن تربية النفس ، دغري خطر في بالي محاولاتي الفاشلة ، وجددت العزم "مابدهاش ياحنين انت مو ضعيفة لهالدرجة".. وبكل حماس قررت أعيد التجربة لأشياء مختلفه وبالتدريج ، طبعاً ولافكرت استغني عن الأجهزة والنت ادري ماوصلت لهالمرحلة بعد لكن طموحي وهدفي لها بمشية الله ..
اخترت القهوة والشاي .. ولأنها متداخلة في يومي تداخل الأحشاء فبعضها ، سار عندي فضول كيف الحياة بدونها ؟ حسيت بانو التحدي مابيكون سهل ، الادمان من جهة و عدم وجود خيارات شرب من جهة ثانية ..
بدأت السبت ، و بدأت الحيرة اش اشرب مع المسلسل و اش اشرب مع الوجبات و اش اشرب في المحاضرات و اش اشرب اذا كنت فاضية " اقدس المشروبات " / العصائر خيار مستبعد لأنها لازم تكون بارده والجو بارد فـ لا
بدأت رحلة البحث والتجربة ، طبعا الحليب والمويا كانو المنقذين فوقت العزقات ، واكتشفت مجموعة مشروبات 👌🏽
في يوم الأربعاء بدأ جسمي يفقدها و بدأ الصداع القاتل لدرجة تركت كلشيء ورحت نمت ، توقعت الصداع يلازمني من أول يوم لكن الحمد لله عالأخير فقط .
و اكتشفت كمان انو الحياة مملة بدون قهوة ☹️
جميع المشروبات ماهي بمتعة التلذذ بالقهوة ، لكن هذي هي الحياة ، اهوه مامت اهوه خلصت المده وشربت قهوة وشاي ، الصراع الحقيقي وقت ما انا جالسة فكوفي الجامعة وريحة القهوة تنخر فمخي ، لمن ادخل البيت وريحة القهوة بخور بخور ، وجلسة المغربية الكل بقهوته وأنا اشرب حليب مع الحلا 😶 بس صامدة 💪🏼
اصلاً هنا المقصد ، شعور القوة والتمنع و محاربة النفس والصمود له لذة ✨
📌 #لاحظتي تغييرات ؟
اعتقد اسبوع مايبين تغيرات واضحة ، لكن ابرز شيء لاحظته هو النوم ، حرفياً ٢٤ ساعة نايمة واذا مو نايمه فمسترخيه ، عادةً نومي غلس ، دخولي فالنوم صعب وتعمقي فالنوم برضو صعب ، بدون الكافيين قبل يوصل راسي المخدة اكون قيد نمت لووووووول / واذا صحيت أكون مصحصحة حتى لو نايمة قليل ، نقطة جداً مهمة لفترة الاختبارات "الأرق يلعب فحسبتي وقتها" فاعتقد اني باعيد التجربة مع الاختبارات .
🗯
📌 # اش الفايدة من كل هذا التعذيب ؟
النفس كما الطفل ، تعاند وتفلت وتطيش وتتربى ، ممكن توصل أوقات اننا مانقدر نسيطر عليها ، مثلاً شفت كثير ناس مو قادرين يسيطرون ع هوس التسوق عندهم وصل لدرجة المرض ومتعذبين بس نفسهم استقوت عليهم خلاص ، وناس عندهم عادات سيئة مو قادرين يتركونها لأن خلاص نفسهم اقوى منهم " التدخين ابرزهم "
فهالشيء يساعدنا نبقى مسيطرين ع رغباتنا وشهواتنا ، اذا في يوم بغينا نغير او نقطع عادة او نخفف منها بيكون سهل علينا ، نفس الشيء ينطبق عالاشخاص ، اللي نحس انهم ساروا اساسيين في حياتنا ونقول لو يطلع من حياتي اموت وبلا بلا بلا نبعد عنهم بارادتنا فترة ونثبت لنفسنا انو خلقنا بدونهم ونقدر نكمل بدونهم .
🎐 خُلقت حر ، ليش تقيد نفسك !
من باب الشيء بالشيء يذكر ، من شهور وبدون معرفة بموضوع تربية النفس قررت امتنع عن الاغاني لفترة غير محدده ، وصلت مرحلة مرضية من الادمان ، انام على اغاني اصحى على اغاني م اكلم احد ولاحد يكلمني الين انا طفشت من نفسي " عندي مشكلة اذا حبيت شيء انكب عليه كب ماعندي توزيع منطقي 😬" ، قلت بعد كل هالتعود باشوف قد اش ممكن اصبر بدونها وكيف بعبي فراغها ؟
اليوم الأول اشبه بعلاج ادمان مخدرات ، ادور ادور مو عارفه اشتغل احس فيه شيء ناقص فيه شيء ناسيته ، الوضع غريب علي ، اشغلت نفسي بالقران وأناشيد ومقاطع يوتيوب وبرودكاست مفيدين وأوقات اجبر نفسي اشتغل بدون أي صوت ، ماكان الموضوع بالسهولة اللي اتوقعتها بس بالنهاية قدرت ، والحلو في الموضوع اني توقعت ارجع ملهوفة وابقى ع حالي السابق لكن الحقيقة رجعت بنصف الادمان وهذا شيء جبار 👌🏽
📌 #نقطة_مهمة
ايجاد البدائل شيء أساسي عشان تشغلين نفسك وتملين وقتك ، بنفس الوقت هي فايدة جميلة لانك بتكتشفين حاجات تقولين ويني عنها من زمان !
عشان اقدر اعوض القهوة والشاهي جربت كثير مشروبات وقلت ويييني عنها من زمان ، لو تعيدين تجربتي هذي المشروبات بتكون بديل يسد مكانها :
الأعشاب .. 🌿
⦁ [ كركم طازج - زنجبيل طازج - نعناع حساوي " حبق " ]
⦁ [ مرامية - زنجبيل - كمون بودرة ]
⦁ [ بابونج ]
⦁ [ قرفة - نتفة فلفل أسود - زنجبيل ]
الحليب .. 🥛
⦁ [ الكثير من القرفة البودرة - شوكولاته بودرة - فلفل أسود ]
⦁ [ كركم بودرة - هيل وقرنفل وقرفة بودرة ]
⦁ [ حليب بالزنجبيل ]
⦁ [ حليب بالقرفة ]
⦁[ حليب بالفانيلا ]
⦁ [ حليب بالفلفل ]
⦁ [ حليب بالكركم ]
⦁ لاتيه بدون قهوة 😅
جربت لاتيه الزنجبيل ( هنا ) بدون القهوة ، نص حليب ونص سيرب الزنجبيل 👌🏽
جربت جميع انواع اللاتيه وحذفت بارت القهوة منهم 😁 وترا كانت لذيذه يعني مافرقت كثير
⦁ حليب بزبدة الفول السوداني ( هنا ) 😋
⦁ السحلب / شاي الفواكة / العصائر .. الحياة مليانه خيارات
اليتيوب ساعدني كثيييير كثير ، ابحثي بتلاقيم مشروبات عجيبة
التجربة فالصيف بتكون أجمل اتوقع عشان العصيرات والسموذيز
بس حتى فالشتاء المشروبات الدافية لذيذة ولها جوّها ..
أخيراً 💌
شعور التحرر لايوصف ، شعور النضج و القوة مالهم مثيل ، الموضوع يستحق التجربة فعلاً
عشان كذا قررت اكرر التجربة فيه كثير شغلات متعلقة فيها لازم اخفف هالتعلق ، وعقبال عندكم :)
" دمتم بعزيمه و إرادة "
❤︎
9 comments