ثَرثَرةْ ♣ الهوايات وَ المواهب
" السلام عليكم ورحمة الله وبركاته "
صباحِك / مساءِك رآحة
برأيي دايماً الي يبغى الفلوس ( دخل و مصدر رزق ) سهل جداً يجيبها ، لكن مشكلتنا متخيلين الوظايف تجي تطق بابنا ، أوتكون مكتب فاره ومكيف يهفهف وشغلتنا توقيع ورقتين وخلصنا .. وآخر الشهر يتعبى رصيدنا البنكي بـِ القرنقش !
والحقيقة إن في الوقت الحالي مصادر الرزق كثيرة بس كل شيء يبغى له شوية تضحيات وتعب ودعاء .
سار أي شخص يبغى يتاجر ممكن يبدأ برأس مال بسيط وممكن بدون , والتقنية فادتنا جداً لو استغلينا هالفايدة بشكل صحيح .
ممكن تستغربين إش دخّل المقدمة هذي بالعنوان !
بطبيعة الحال إنك لما تفكرين بإنشاء مشروعك الخاص سواء لحاجة مادية أو للتسلية تفضلين يكون شيء تحبينه , عشان تتسلين وتستمرين وتحسين إنك حابة الشغلة وماتملين منها بسرعة .
الشيء الي يونّسك وتحبين تشتغلينه هو هوايتك و موهبتك , عشان كذا هي مهمة لنا في جوانب كثيرة غير المثال الي ذكرته .
~ الهوايات و المواهب :
هي أبسط طريق للمشاريع ، مهم جداً تكتشفينها من بدري وتشتغلين عليها ، أجزم لك راح تحتاجينها في يوم وراح تنفعك بعد الله .
نلاقي مرات بنات لو سُئلت إش موهبتك أو هوايتك بتقولك ماعندي أو ما أعرفها ، والحقيقة إن مافي إنسان ما عنده موهبة ، الدراسات تقول إن كل إنسان عنده أكثر من 3 من المواهب على الأقل .
ــ طيب السؤال يقول ليش هي مهمة ؟
~ أهمية الهوايات و المواهب :
بالنسبة لي أهميتها توازي أهمية الوظيفة بوقتنا الحالي , أول أهمية لها هي الدخل ؛ يعني لو موهبتك غريبة ونادرة ممكن تنشهرين من خلالها وتستفيدين من شهرتك , أو حتى لو كانت شغلة مطلوبة في سوق العمل أو في الحياة العادية .
ثاني أهمية هي الترويح عن النفس , ولا تقل هذي الأهمية عن الأولى , مع ضغوط الحياة وأشغالها الي ماتخلص يحتاج الإنسان لفترة نقاهة ينفّس فيها عن نفسه وياخذ بريك يستعيد فيه توازنه ويرجع لحياته وشغله بنفس منفتحة ومرتاحة .
ثالث أهمية هي الثقة , الإنجاز المبدع و تلقي المدح يُشعر الإنسان بالفخر ويرفع مستوى الثقة بشكل ملحوظ .
رابع أهمية إتقانك وبروزك في مجال يحفزك تتعلمين أكثر وتتعدد المجالات خصوصاً لو خلصتي من الأولى وأتقنتيها للنهاية , وتنجزين شغلات مفيدة في حياتك .
الخامسة مو لصاحب الموهبة إنما لمجتمعه والناس الي حواليه , المواهب منفعتها متعدية ما تقتصرعلى صاحبها فقط .
المنفعة ممكن تكون فعلية ( زي الطبخ و التجارة و التأثيث ) , أو لازمة ( زي الرسم والعزف و عروض السيرك ) يتسلّى فيها المتابع وينبسط لكن مايلقى منفعة عينية .
~ تعريفهم :
* تعّرف الموهبة أنها :
كلمة موهبة مأخوذة من الفعل ( وهب ) أي أعطى شيئاً مجاناً , فالموهبة إذاً هي العطية للشيء بلا مقابل .
" يعني ان الموهبة تولد مع الإنسان هبة من الرب وهي ميزة يتميز فيها الشخص في مجال معين أو عدة مجالات عن أقرانه ".
* تعرّف الهواية أنها :
أي عمل يقوم به الإنسان، ويحب أن يفعله أو يزاوله أو يتعلمه في وقت فراغه أو من أجل الاستجمام والمتعة والفائدة .
" يعني أن الهواية عمل يحب الشخص ممارسته ويلاقي فيه راحة وسعادة , ويطوّر نفسه فيه حتى يتمكن منه ".
~ الفرق بينهم :
يتشابهون كثير لدرجة يصعب التفريق بينهم أحياناً , الموهبة ينولد الإنسان وهي معه , تبدأ تكبر كل ما يكبر , والهواية شيء يحبه الشخص بعد مايكبر ويهتم فيه إلين يسير خبير فيه ؛ والشبه بينهم كبير جداً .
وفي رأيي إن الموهبة هي توأم الهواية وممكن الموهبة تسير هواية , والهواية مع الممارسة والتمكن تسير شبه الموهبة .
~ كيف أكتشفهم ؟
- الموهبة : تبان ملامحها من الصغر , وتطلع بالإحتكاك والتجربة , يعني الموهوب بسرعة الحساب مثلاً ماتبان موهبته إلا لما يدرس الرياضيات ويحتك بالمسائل وتجرى له إختبارات وقتها تبرز موهبته .
- الهواية : تبان الهواية مع وعي الإنسان , وتطلع بديهياً بدون تجربة وإختبارات , يحب الإنسان يتعمق في هوايته وتلاقيه غالباً خبير في المجال , ( قريبي مهووس بالأجهزة والإلكترونيات بجميع أنواعها وبالإنترنت ماشاء الله خبير متعمق فيها بدون دراسة ولا دورات يزبط لنا مشاكل أجهزتنا ونستشيره بأي شيء نبغى نشتريه , حتى هوايته هذي فادته في مجال عمله بشكل كبير , عنده غرفة تشوفينها كأنها معمل لو يجلس طول يومه فيها مايحس بنفسه ) .
* ممكن تسألين نفسك بعض الأسئلة تساعدك في معرفتها :
ـ اش هي المادة المفضلة عندك بالدراسة أو الي درجاتك فيها مرتفعة ؟
ـ اش أكثر عمل تسوينه بدون أمر أو إلزام ؟
ـ اش أكثر شيء تحبين تقرين عنه وتتعمقين فيه ؟
ـ اش أكثر شيء تتلقين مدح عليه ؟
ـ إذا عندك وقت فراغ إش أول شغلة تجي ببالك تقضين وقتك فيها ؟
وممكن الإختبارت على الإنترنت تساعدك كمان .
~ مواقع مفيدة :
* موقع أجيال الموهبة :
* موقع موهبة :
هو مشروع مؤسسة الملك عبدالعزيز ورجاله للموهبة والإبداع , يقدم إختبارات لإكتشاف الموهوبين , يتم ترشيحهم إما من المدرّسين أو أولياء الأمور أو الطالب نفسه , إختبار قياس يتم بآلية معينة يقيسون عن طريق درجة الطالب مدى موهبته يتبنونها وينمونها .
* تجربتي معه :
إترشحت في سنة خامس إبتدائي وإختبرت لكن ماكملت معاهم مع إن درجتي كانت جيدة جداً لكن ربي ماكتب , بعده إترشحت في ثالث متوسط و إختبرت وإختاروني لأولمبياد الرياضيات لكن أبويا رفض , وقدر الله وماشاء فعل .
المركز يتبنى الإختراعات كمان ولصديقاتي تجارب ممتازة معه , ويوفر خدمة الإستشارات كمان .
لاتهملون مواهب أطفالكم أبد نماذج الإختراعات المعروضة كانت إبداع لا إله إلا الله ؛ أتذكر في الثانوي كرّموا ثلاث طالبات من المدرسة إختراعاتهم أخذت الثلاث مراكز الأولى , طالبة بالميدالية الذهبية وثنتين بالبرونزيات , ماكانوا زايدين عننا بشيء غير إهتمام وتشجيع الأهل .
فيه عمل رائع لهم , مجموعة قصص عن الإبتكار والبحث العلمي للأطفال ( هنا )
~ إشتغلي على موهبتك واستفيدي منها :
لما تكتشفين موهبتك إحمدي ربك لأنها نعمة عظيمة , وشدي حيلك الإنترنت مايقصر والكتب تملا الأرض , فكري كيف ممكن تستفيدين منها ؟ كوّني لنفسك جو وعيشيه , وخلي الكل يعرف فيها حتى إذا جا طاريها الكل يرشحك .
خلي الكل يستفيد منها , والهواية الي تضرك أو تضر غيرك اتركيها , الهواية المحرمة لاتعطينها مجال تحبينها واتركيها لوجه الله .
~ سبع صنايع والبخت ضايع :
هذا المثل يطلق على صاحب المواهب الكثيرة لكن مو مستفيد منها , و موملاقي وظيفة مع كثرة مواهبة , لاتخلين هالمثل يطلق عليك أو يوصف حالتك , ولاتستصغرين مواهبك لو إش ماكانت تافهه .
# ملاحظة : المواهب مالها أي علاقة بالذكاء والعبقرة , ممكن تلاقينها حتى عند المصابين بالتوحد أو المتخلفين عقلياً .
دمتم بِـ رآحة ❤
2 comments