مرحبا ..🌸

في التدوينة السابقة اتكلمنا عن 

كيف ازيد فرصتي في الحصول علي وظيفة ؟

و اتفقنا انو لازم نكون جاهزين لمقابلات العمل، لأنها بعد الله بتكون ٩٠٪ سبب في حصولنا على الوظيفة من عدمه.

طيب كيف نكون جاهزين؟

مجموعة نقاط بسيطة لكن مهمة، اتكلمت عنها في فيديو يوتيوب لو حبيتو تسمعون:

🌸

● لبسك وشكلك يعطي انطباع أولي مهم عنك. اللبس الرسمي النظيف وعدم التكلف بالزينة أو العطر بيعطي إيحاء بجديتك و مناسبتك لجو العمل.

● حاولي تروحين لمكان المقابلة من قبل بوقت، حتى تتلافين مواقف التأخير أو اللخبطة في الأماكن

كمان عشان تدخلين المقابلة مع اوائل المرشحين وهذا شيء مهم، لأن غالباً الي بيعمل معك المقابلة بيكون رايق بالبداية بعدين يحس بالتعب والملل على اواخر المرشحين في حال عددهم كبير، أو ممكن يحدد من أول المقابلات الشخص المناسب والباقي فقط يقابلهم مجاملة بدون تركيز.

● اكتبي الاسئلة المتوقعة في المقابلات و جاوبي عليها اجابات واضحة وقصيرة واحفظيها

غالباً الاسئلة معروفة، تبدأ من عرفينا عن نفسك، أو كلمينا عنك، أو ايش عندك خبرات و صفات خلتك تقدمين على هالوظيفة؟

لمن تحفظين الاجابات وتجين فالمقابلة راح تلاقين نفسك نسيتيها، عادي اتز اوكى.. مخك فاكر المضمون والترتيب، فراح تطلع منك عفوية لكن ماراح تجيبين العيد في الاجابات أو تنسين من الربكة *ويطلع صوت صرصور الليل*

المقابلات الي رحت لها وانا مو مستعده بس في بالي اني خلاص صايده الوضع جبت فيها العيد وجاوبت اجابات ماكان المفروض اقولها، عشان كذا مرا مهم نستعد ونحط في بالنا اجابات لكل سؤال متوقع.

● سوي بروفتين للمقابلة، مره كوني أنتِ موظف الموارد البشرية واختك المرشح للوظيفة، وشوفي ايش انطباعك عنها؟ كيف طريقة كلامها ارتباكها اجاباتها، وعشان تشوفين انو الموضوع عادي ما يخوف 😅

ومره ثانية أنتِ المرشح، وشوفي سرعتك في الرد، عفويتك، هدوءك ...

● لا ترفضين اي مقابلة، سوي مقابلات قد ماتقدرين، راح تعطيك خبرة كبيرة جداً عن نفسك وعن متطلبات سوق العمل، وراح تشيل منك مره بعد مره رهبة المقابلات.

● خليك رايقه ومرتاحه، لو الوظيفة من نصيبك راح تاخذينها بكل بساطة وتيسير، ولو ماهي من نصيبك ما بتاخذينها لو جاوبتي على كل شيء اجابات نموذجية، الهدوء وعدم الشفاحة على الوظيفة يبان عليك ويعطي انطباع جذاب جداً، بعكس المستميت على الوظيفة.

● أخيراً وليس آخراً: لا تتكلفين، لاتزيدين صفات وأشياء ما عملتيها أو منتي قدها، لاتخلين الي قدامك يرفع سقف توقعاته فيك واذا وظّفك يُخذل، بالعكس اعطيهم المهم والحقيقي، والزيادات الجميلة راح يشوفها صاحب العمل بعد التوظيف و يتفاجأ إيجابياً وهذا اللي نبغاه 👌🏽

🌸

بالنهاية قد أكون اصبت أو اخطأت، شاركوني من خبراتكم يا اصدقاء

 و شكراً لكم .