ربوعيتنا

التطوير الشخصي

صحة و رياضة

تبييض الاسنان | ليزر فيليبس زووم ..🦷✨

by - 7:57 PM

مرحبا ..🍃


ــــــــــــــــــ 🦷✨ ــــــــــــــــــ


قبل سنتين و نص كانت أسناني بدرجة ٩ تقريباً .. اهتمامي فيها كان ٤ من ١٠ + ادمان القهوة و الشاي 😬
كان في بالي أسوي تبييض بس مابحثت ولا أخذت قرار جدي .. لكن لحسن الحظ
الفرصة جات إلى عندي 🤩

بدون ذكر لتفاصيل القصة حتى مانطول لكن الفرصة جات وأنا مسافرة وباقي كم يوم وارجع ، والتبييض يحتاج قبله تنظيف أسنان ، ولحسن الحظ كنت قبل اسافر مسوية تبييض وجاهزة ، وهالشيء اختصر لي الوقت كثير ..

ــــــــــــــــــ 🦷✨ ــــــــــــــــــ

• يعني تكنيكياً أول خطوة هي عمل تنظيف للأسنان

ثاني خطوة هي جلسات الليزر ، مقسمة على ثلاث جلسات في ثلاث أيام
كل جلسة مدتها ٤٥ دقيقة " بناخذ تفاصيل الجلسات بعدين "

ثالث خطوة هي تعديل الحشوات حسب لون التبييض

رابع خطوة تفصيل قوالب على أسنانك لعمل رتوش تبييض منزلي كل ٤-٦ أشهر أو حسب الحاجة ..

ــــــــــــــــــ 🦷✨ ــــــــــــــــــ


طيب نرجع للجلسات ، تاكلين وتشبعين تماماً ، تروحين الموعد و تبقين ٤٥ دقيقة تحت الجهاز نفس الصورة .. ماحكيكم عن كمية الألم بمثبت الشفايف الأبيض قد اش يقطع الفم تقطيع ، تخيلي كل هالوقت وأنتِ فاتحة فمك ومشدود 😭

ماعلينا ، الألم الأساسي هو فالأسنان والله ، بس من بغى الدح ماقال اح 🤭
أثناء الجلسة الألم نادر ، بس بعد الجلسة ولمدة ٢٤ ساعة تسير زي الإلتماسات أو البرق في أسنانك فجأة ، شيء فضييييييع

طبعاً ٤ ساعات بعد الجلسة ماتاكلين ولا تشربين ، وباقي اليوم فقط مشروبات بالمصاص .. حلو ؟
نفس الشيء مع اليومين الثاني و الثالث ...

طبعاً النتيجة من أول جلسة كان بياض ناصع يجنن ينسيك الألم 😅 ، ماودك تروحين عن المرايا 🤤
..

بعدها كل فترة إذا حسيتها بدأت تبهت استخدم التبييض المنزلي ، ٦٠٪ يرجع اللون نفس ماكان / و الألم أخف بـ ٥٠٪ تقريباً .

ــــــــــــــــــ 🦷✨ ــــــــــــــــــ

الأسئلة الشائعة :
📌 هل يأثر التبييض على الأسنان ؟
💬 حسب تجربتي إيوا ، اسناني كانت حساسة و زادت حساسيتها تجاه الايسكريم و البوارد ، لكن مو بالدرجة الكبيرة .

📌 إلى متى تدوم النتيجة ؟
💬 حسب محافظتك علي أسنانك ، إذا تفرشين باستمرار مرتين إلى ثلاث باليوم " وحده بالمعجون والباقي ماء و الفرشة فقط حسب كلام دكتوري " + تستخدمين الخيط + مشروبات صبغية قليل ، و قهوة وشاي بالمصاص .. هنا اضمن لك سنوات والنتيجة تخف تدريجياً / والعكس صحيح يمكن حدك ٦ شهور وترجع زي ماكانت إذا فيه تدخين أو كافيين و صبغيات كثير وبدون إهتمام .

📌 هل ينفع نستخدم التبييض المنزلي بدون عمل جلسات ليزر ؟
💬 ماعندي علم حقيقي ، لكن ما أعتقد .


📌 كم سارت درجة بياض أسنانك بعد التبييض ؟
💬 هذي صورة أسناني بعد أول جلسة مباشرة ، والنتيجة استمرت تقريباً سنة كاملة بنفس الدرجة مع التبييض المنزلي و المحافظة .. يعني تقريباً درجة ٣ 
"الصورتين بنفس الوقت بس يسار بفلاش ويمين بدون"



📌 كم التكلفة ؟
💬 التبييض مع القوالب و باكيت التبييض بـ ١٠٠٠ ريال .. 

ــــــــــــــــــ 🦷✨ ــــــــــــــــــ

للاستزادة شوفوا موقع فيليبس ، فيه تفاصيل الجهاز الاساسي عند العيادة + تفاصيل التبييض المنزلي ..
( هنا )
عن مادة التبييض المنزلي ..
( هنا )

ــــــــــــــــــ 🦷✨ ــــــــــــــــــ

التجربة كانت جميلة ١٠٠٪ ، ماندمت عليها أبداً ..
و حلو لو الشخص كل خمس سنوات يرجع يسوي عند العيادة مع تنظيف كامل .. الأسنان تبقى من أهم إذا ماكانت الأهم في تفاصيل الوجه و الجمال ..

.
.
عندكم تجارب مع التبييض ؟

" دمتم بـ جمال "

❤︎


You May Also Like

1 comments