اسئلة و اجوبة | ❓💬
مرحبا .. 🧚♀️
قبل شهر نزلت بوست في مواقع التواصل [ تويتر - سناب - انستا - صراحة ] وطلبتكم تسألوني اسئلة [عامة - شخصية] و راح اجاوب عنها في تدوينة ، شكراً لكل اللي سألوا ، ويلا نجاوب ..
ــــــــــــــــــــــــــــــــــــــــ 🌱 ــــــــــــــــــــــــــــــــــــــــ
✨ الاسئلة الشخصية :
• ايش برجك :
💬 الحَمَل ♈️
و أحب إني أنثى الحمل ، بقدر حُبي لإناث الأسد .. صفاتهم و قوّتهم و جنانهم يعجبني ..
• مدينة سعودية تتمنين تزورينها :
💬 هممممممم سؤال مُحيّر بما إني ختمت مدن السعودية ماشاء الله 🤭
لكن الشرقية زرتها وكنت صغيرة قبل ١٦ سنة 😬، اتمنى ارجع لها ثاني واشوفها ، حيل مفتونه فيها و بأهلها .
جدة كمان من المدن اللي امر عليها مرور الكرام ماقد فرفرت فيها فاتمنى ازورها .
واتمنى ازور الشمال وقت الثلوج ☃️
• لو ماتخصصتي إدارة أعمال ايش كان ممكن تتخصصين :
💬 في ترتيب رغباتي كان الإدارة أول رغبة و اللغت و الترجمة ثاني خيار ، وكنت بكون مبسوطة قد انقبلت بأي واحد فيهم / لكن مؤخراً اكتشفت تخصص جميل مو موجود في جامعة طيبة ، وهو كلية التصاميم والفنون .. هذا هوايتي والتصميم الرقمي بالذات ، افتكر مره شفت تعريف بالتخصص على سناب الخلطة الجامعية ، حيييييل تمنيت اني ادرسه ، اصلا فتح التخصص بعد دخولي الجامعة بسنة ولكن يلا مو مشكلة التعليم الذاتي يحل المسألة / وإدارة الأعمال ونظم المعلومات هو التخصص العام لتخصص التصاميم تقريباً يعني عندي الأساس بقي علي التفاصيل .
• هل عندك هدف تكتبينه كل سنة وما حصل لك تشتغلين عليه :
💬 أمانة إيوا ، ماتوقع فيه أحد ماعنده هالشيء 🤭 / تطوير اللغة الانجليزية و الرياضة .. اتوقع كمان هم الهدفين نفسهم لأغلب الناس ، حتى يجيني شعور راحة لمن في دروس التخطيط يضربون مثال في هالهدفين واحس انو اووووه الحمد لله مو أنا لحالي 😅
لكن على قولة جوليا بطرس : إزا مش هلق .. يوماً ما 🎵
• حكيني عن نفسك :
💬 انثى حالمه ، تحب الحياة و الجمال والسعادة والهدوء و السلام 🕊
في كل مكان تلقيني ، مجنونه وعلي هبّات عبيطه .. متطرّفه ماعندي وسط
تحكيني ماما : كنت بس نطلع مكان اروح العب م اجلس أبداً ، ادخل البحر ما اطلع .. اعشق اللعب لدرجة يجيبوني غصب آكل
وفي البيت ٢٤ ساعة متعلقه في الابواب و فوق الدواليب ، م اقر عالأرض 😅 / واقعد بالساعات على اشرطة الڤيديو والمغامرات "طفولتي عبارة عن أناشيد سنا و قناة المجد و الأفلام الوثائقية " 🙁💓
مراهقتي هادية ، مندمجة مع صديقاتي و دراستي "هوس دراسة و فُل مارك و أولمبياد الرياضيات و موهبه" .. الحمد لله إني طلعت طاقتي بالطفولة ، اتخيل كنت راح أكون مراهِقه مجنونه وصعب السيطرة عليها ../ بس اللي افتكر اني كنت عنيده لدرجة اسمي "صبّه" مو حنين 🤭
الثانوي كانت من أجمل مراحل حياتي .. تغيرات كثيرة سارت في حياتي ، أجمل الصديقات و الأيام ../ الجامعة عاد فترة النضج و الوعي على كل شيء ، فترة الكفاح والجهاد الجدّي مو لعب الثانوي ، بداية التدوين ، عوالم جديدة ..✨
حب السفر يجري بدمي ♥️ .. و البحر 🌊 .. والقهوة ☕️ .. والأغاني .. 🎵
إيجابية ، مُتفائلة ، صريحة جداً ، دمي ثقيل مو أي شيء يضحكني أو يعجبني ، أحب الدراما حُباً جمّا ..
• كيف تعلمتي الطبخ :
💬 بدأت الطبخ في سنة سادس 🤭 طبعاً ادخل المطبخ من ورا ماما واتعلمت افك الغاز بنفسي .. أول طبخه عملتها هي ساندوتشات التونه و كنت احبك الشاي حبكه 👌🏽 / ولأن ٢٤ ساعة اتفرج برامج الطبخ سار عندي فكرة عالتكنيكات والأسماء و المكونات ووو ، فـ اخبص في كل مره ادخل فيها المطبخ واشوف ايش يطلع معي ، وغالباً تطلع نتايج مش بطاله 😎 إلين اعترفوا بموهبتي وسار مسموح دخولي للمطبخ وتطبيق الوصفات 👩🏻🍳 ومن هذاك الوقت لليوم وأنا مستمره اطبخ و أجرب واتفرج ومهتمه بالمجال .. وبكذا اتعلمت 🤷🏻♀️
• كيف قضيتي عزلة السوشال ميديا بدون ماتحسين ان في ناس بتزعل مثل الاقارب والصديقات لانك تركتي البرامج فتره بدون ماتكلمين احد خصوصاً الناس اللي لما تغيبين يضنو انك متضايقه منهم بس بالعكس تحبينهم لاكن تحتاجين راحه كيف ابين لهم بدون مايزعلون وبنفس الوقت ارتاح بعزلتي ؟!
💬 أول شيء الناس آخر همي 😅 ، م استشرت أحد ولا بلغت أحد ، مجرد عيلتي لأنهم أوقات يرسلون أشياء مهمة فقلت لهم راسلوني SMS / والباقي عادي ماغلطت على أحد يعني ماعرف وين المشكلة فالموضوع .. إذا فيه ناس مهمين اعطيهم خبر وبس ارتاحي واستمتعي ..
أما كيف قضيتها ، قضيتها بأمتع مايمكن .. ماخططت أبداً بس عشت بعفوية وسويت كل شيء من زمان عنه و احبه / واكتشفت قد اش الأجهزة سارقه الوقت ومشتته المخ .. وعزمت اخليها تجربة شهرية إن شاء الله .. 💪🏼
• ايش دافعك للاستمرار بالتدوين :
💬 حُبي للتدوين واستمتاعي فيه ، و تأثيره الفعلي علي بتطويري وشغل وقتي بالمفيد و ردود الفعل الجميلة اللي تجيني تزيدني حُب و حماس .. م انكر انو تجي أوقات خلاص مابي شيء ابي اقفل كل حساباتي و المدونة وارجع انسانه غير معروفه ، لكن آخذ بريك كم يوم اشتااااق للتدوين و قروشة التدوين 🤭 / وأكيد رغبتي بأني إذا فيوم رحت عن هالدنيا يكون فيه شيء مستمر يدل علي ويفيد غيري .
ــــــــــــــــــــــــــــــــــــــــ 🌱 ــــــــــــــــــــــــــــــــــــــــ
✨ الاسئلة العامة :
• من فين تاخذين مصادر المعلومات :
💬 من تجربتي الخاصة ، و ادعمها أكيد ببحث في المدونات و قوقل و الانستا ومواقع التواصل .. و بعض الأوقات من الكتب في حال مرت علي معلومة سابقاً .
• دليني على موقع يسوي مدونة :
💬 مافي مواقع تسوي مدونات ، المدونة خدمة من قوقل" منصة بلوقر " وفي منصات ثانية "ووردبريس وغيرها" تنشئين حساب عادي و يسير عندك مدونة ✨ .. والقوالب كمان فيه مواقع كثير تقدم قوالب مجانية أو مدفوعة .. شوفي سلسلة صناعة مدوّن شرحت فيها طريقة إنشاء مدونة من الألف للياء [ صناعة مدون ]
• كيف اسعى لشيء الي بدي هوا اوك أنا حابه هالشيء بس في مخاوف :
💬 المخاوف والصعوبات هي شيء أساسي ، تعطي طعم للانجاز وتحدي ، الشيء السهل الحصول عليه ماله طعم ولافيه فخر .. / المخاوف مابتخليك تتحركين من مكانك .. المسألة عزم و محاولة وشجاعة .. واذا الإنسان فعلاً بغى شيء يجيبه مهما كانت المخاوف أو الصعوبات ..
• كيف اتخلص من العادات السيئة :
💬 بالعقاب 🤭
عني أنا أحاول ارد نفسي عن العادات السيئة بالنذر ، مثلاً انذر اتصدق بمية ريال اذا سويت الشيء الفلاني .. أو اصوم يومين وهكذا .. و ٩٠٪ جابت نتيجة 😁 .. / و اشغلي نفسك عنها ، حطي بدائل ، وهو غالباص يعتمد الحل على نوع العادة ..
• أحب التصوير كيف اخذه كبزنس :
💬 افتحي حساب انستا و مدونة ، اختاري اسم و لوقو .. صوري صوري و صوري .. لمن توصلين لمستوى متقدم راسلي اصحاب منتجات واعرضي عليهم التصوير مجاناً و ارفقي لهم نماذج من شغلك ، وخليك حرّيكه ومقتنصه للفرص ، ولكل مجتهد نصيب .
بس نقطة مهمة : حددي مجال معين للتصوير ( بورتريه - أكل - حفلات وتغطيات ...) وركزي عليه .
• بما اني عاطلة كيف املئ يومي اشغال وادخل منها دخل مادي :
💬 اختاري مجال تحبينه وتستمتعين فيه وإبدأي بامكانيات بسيييطه .. وكبري نفسك شوي شوي واشتغلي من كُل قلبك ، وراح تحصلينه بمشيئة الله / وخذي فيه دورات إذا ممكن عشان تدعمين نفسك ..
• لم تمض عدة أشهر على بدء مشواري في الرسم، مجرد خربشات لا اكثر الى ان توقفت مؤقتا، لسبب ان حاجتي
ملحة الى ارشادات او نصائح توجهني نحو الطريق الصحيح لتعلم فن الرسم. بصفتك خضت او تخوضين نفس التجربة هل ربما يمكنك مشاركة ما جعلك تواصلين التطور في هذا المجال؟ وشكرا لروحك اللطيفة على فتح مجال طرح السؤال ❤ :
💬 نصيحتي : لاتوقفين ، مارسي مارسي .. خربشي ، ارسمي على كل شيء يطيح بيدك ، ارسمي كل شيء (ناس - حيوانات -طبيعة - ازياء - أكل - ...) قلّدي و شفّي رسمات واشتغلي على تفاصيلها ، التدريب مُعلّم الجميع ، ومجاناً ..
الشيء اللي غلطت فيه فهالمجال إني وقفت تقريباً ست سنوات .. كان المفروض اني مستمره وواصله مستوى أعلى بكثيييير ، لكن وقفتي هذي رجعتني للخلف والعودة ماكانت سهله ولكن درس حياة ✨.
+
املئي عالمك بالرسم و الرسامين وكتب تعليم الرسم والحسابات في كل مكان ، حتى تاخذين تغذية بصرية ومعلومات باستمرار .👌🏽
• كيف الوحدة تواجه ظروفها اللي ماسمحت لها تكمل دراستها الجامعية ، وهي طموحة جداً وكانت متفوقة في دراستها ، ولما ماقدرت تكمل خلاص فقدت الشغف :
💬 إذا رجعت لها الفرصة تدف نفسها وتغصبها تكمل وراح يرجع الطموح والشغف بمجرد ماتدخل في الجو .. / وإذا باقي الفرصة صعبة تجي تدوّر البدائل ، في الدورات في الدبلومات في التعلم الذاتي في التطوع .. الآن العالم يعتمد على امكانياتك وخبرتك أكثر من شهادتك " اوكى صحيح ماوصل هالشيء لمجتمعنا لكن راح يوصل" + اذا الانسان عنده لغة انجليزية + حاسب + خبره "بالعمل التطوعي مقابل شهادة الخبرة" اعتقد بتكون الفرصة عنده مساويه لصاحب الشهادة ، / خصوصاً في المجالات العملية زي التصميم أو الاعمال الحرفية أو التصوير و المونتاج أو الكتابة .. بحيث لما تقدمين على عمل يكون معك نماذج من شغلك تدعمك ..
أما إذا ودك بالدراسة عشان العلم مو عشان الوظيفة فهنا الموضوع ابسط و اسهل .. لأن المصادر على قفى من يشيل .. سواء انترنت أو محاضرات ودورات أو كتب / وصدقيني فهالكون مافي تعب يضيع .. كل شيء يرجع بطريقة ما في وقت ما بس نصبر .
ــــــــــــــــــــــــــــــــــــــــ🌱 ــــــــــــــــــــــــــــــــــــــــ
وبكذا انتهت التدوينة الجميلة اللي نصها منكم و نصها مني ، استمتعت كثير ، ويارب انتو كمان استمتعتوا 😁
" دمتم بـِ حُب "
♥️
4 comments