دعني أخبرك كلمات / فلسفة الحياة
🖇
" الحياة جميلة إن نظرت لها نظرة جميلة
وقبيحة إن نظرت لها نظرة قبيحة "
في اليوم اللي تصحى فيه رايق وسعيد ولو بدون سبب حتى المحاضرات الإضافية تستمتع فيها ، حتى الدوام الإضافي بتقول لمديرك أبشر ياعسل ، واليوم اللي تصحى فيه ع جنبك الأيسر ع قولة الأتراك " كناية عن المزاج السيء " بتلاقي اتفه شيء يعصبك و يوترك ولو كان بوري سيارة طويييييل أو عميل أخلاقه معفنه
# احرص على كل المسببات اللي تخليك تصحى مروووق أروق شيء ، إنت وحدك المستفيد من الجمال ، والخسران الوحيد من القبح ؛ وهيا كذا كذا ماشيه .
🖇
" بتتطّمن إذا تذكرت أن الله عادل ، وأنه هو مقسم الأرزاق "
هالجملة لازم لازم لازم نتعلمها ونعلمّها ونستشعرها بجد ، لمن نفتح سناب انستاقرام أو أو أو ، وونشوف لبس فلانة اللي مدري كم سعره ، وبيت فلانة اللي مافي أفخم منه ، وسفرة فلانة اللي مابقي مكان ماراحتله ، وهلمّ جرا ، مابنقعد نتحسر ع حالنا ولا نحسد ولا نكتئب ولانحس إننا مكبوتين ولاعشنا الحياة ، ليش ؟ لأننا ندري إنو ربنا عادل ، يمكن أعطاها هالشيء بس حرمها شيء ثاني ، يمكن ظاهر أمرها جميل وومتع وسعيد بس بالأصل هيا مو سعيدة وعندها مليون مشكلة إنت موعارفتها ، ويمكن أيامها السابقة كانت عسيره وجهنم والآن ربي فرج عليها ، ويمكن ويمكن ويمكن ، بس الأكيد إنك مو أقل منها ، بس غافلة ، فتّشي عن اللي عندك وبتلاقين أكثر منها .
# جربي تفرحين لإنسانه لأنو حياتها حلوة ولأنها سعيدة ، والله إنو الفرحة والسعادة بتنتقل لك بلا ماتحسين ، ولاحظي أول الجملة قلت تفرحين 👌🏼
🖇
" بقدر ماتملئ حياتك ، تستمتع بها "
الفراغ والملل هو السبب الأول للإكتئاب و للروتين القاتل ، ولمتابعة توافه الأمور ، ليش دايماً يقولون التقاعد مقبرة الإنسان ؟ لأنو يبدأ وقت الفراغ عنده يزيد ويروح يدقق فكل كل شيء وتقل عنده الحركة وتنهشه الأمراض ووو ، لكن الإنسان اللي عمله مو مربوط بسن معين وحياته مليانه فعاليات عنده كثيييير إهتمامات بيبقى طول عمره مشغول مهتم نشيط و شغوف .
الإنسانه اللي اسبوعها فُل أنشطه و أعمال ، مهتمه بالرياضة ، تطبخ وتتفنن وذوّيقه ، أنيقة ولها بالفاشن والموضة ، مهتمة بالميكب تتابع وتطبق وتشتري ، رسامة أو مغنية أو خياطة أو كاتبة أو مصممة أو جامعتهم كلهم ، بتلاقين روحها وشخصيتها وحتى تفكيرها أكبر وأرقى و أونس من إنسانه حياتها روتين X روتين ، فاضية حتى مالها هوايات ولا عندها أحداث بارزة في حياتها .
🖇
" أحِب ، إستمتع "
النقطة السابقة تجيبنا لهالنقطة ، كيف أعبي حياتي إهتمامات ؟ ، حبي كلشيء ماتصنفين مشاعرك تجاهه للكره
امممممممم 🤔
يعني مثلاً أنت ماتحبين اللون الأسود = تكرهينه
وتحبين اللون الأحمر ، حلو ؟
طيب الأبيض و الأزرق و الوردي والبنفسجي والأصفر والبرتقالي ؟
مافي عادي ماحبهم ولا أكرههم
طالما ماتصنفيهم مع الأسود إذاً صنفيهم مع الأحمر
ليش ؟
كثّري من الأشياء اللي تحبينها وقللّي من الأشياء اللي تكرهينها ، هالشيء بيخلي عندك كثيييير خيارات تفرحين وتستمتعين وتنبسطين وتستانسين بسببها
مثال ثاني يقرّب الفكرة أكثر ..
مثلاً أنت انسانه تحبين فصل الشتاء
وتكرهين فصل الصيف
أو خلينا نستبعد كلمة الكره " لأنو مافي شيء يستاهل نحطله مساحة كره فقلبنا " ، نخليها ماتفضلين الصيف ، حلو ؟
يعني راح يكون الربيع والخريف فين ؟ برافو صح عليك مع الشتاء فخانة الحب
يعني راح تستمتعين بثلاث أرباع السنة وتتحمسين للفصول ، اممم والصيف نشوفله حل بعدين 🙃
# لاتكونين إنسانه يصعب إسعادها ، من ابسط الأشياء اخلقي لك حب ومتعة ، كلشيء بتحبينه بتستمتعين فيه ، ولاتجبرين نفسك علي شيء ماتحبينه > لأنك تحبين نفسك ♥️
🖇
" عيش الحزن لتفرح ، ذوق المُر عشان تستطعم الحلو "
تقول الحكمة : بضدها تتميز الأشياء ، تخيل لو كل أيامك سعادة سعادة سعادة وأخبار حلوه وضحك ووناسة ماتنتهي ، طيب بعد اسبوع ؟ طيب بعد شهر أو بعد سنة ؟
بتسير كل هالمشاعر روتين وخلاص بيدخل الملل ، مو نكران نعمه ، بس خلق الإنسان ملول مايملى عينه إلا التراب
الحزن نعمة ، والبكاء نعمة ، والضيقة نعمة
مهما كان الإنسان واصل في حياته من غنى من صحة من جمال من من من ، إلا مايضيق ولو بدون سبب
تركيزي على : استشعري هالضيقة وهالحزن ، إذا حسيتي نفسك مطنقرة = مكربنة = قافلة معك ... عيشي هالشعور فرّغي بشكل إيجابي ، خاطرك تكسرين ؟ اكسري
خاطرك تصرخين ؟ اصرخي " بس عاد زبطي وضعك 😅"
بتفضفضين ؟ فضفضي لو بورقة لو بفويس لنفسك على الواتس ...
بتبكين ؟ ابكي وبصوت عالي كمان وبدموع وبصياح " بس عاد بالهداوة "
ممكن حتى تسوين فيديو كليب " جد والله م امزح " شغلي أغنية حزينة وتعالي عند المرايا وصيحي عليها ، أو ممكن ع سريرك عادي مو جنان ترا > ولو إننا البنات فاهمين بعد وكلنا نسويها 🙊
من حقك تعيشين جميع حالاتك ومن حقك تفرغين
لكن بشرط
مايتأذى مخلوق واحد ، لأنو محد له ذنب فمزاجك
# بمجرد ماتفرغيّن حزنك على قدر مصيبتك بدون جزع أو تسخط ، بتعيشين شعور الراحة بعدها والسعادة اللي بدون سبب ، بيكون فيه توازن طبيعي في حياتك يوم كذا و يوم كذا .
🖇
" الأنانية المحمودة "
نفسك أولاً ، ولا أحد بالحياة أهم منك ، لاتضغط على نفسك ، وتعلّم تقول لا إذا ماتبغى أو إذا ماتقدر ، الحياة اللي ماتحسين فيها بسعادة ببساطه تخلّي عنها
الأم التعيسة فحياتها الزوجية لاتقول بصبر عشان اطفالي ، أنت عليك من نفسك وهم لهم ربهم وقدرهم ، إذا أنت مو حاسة بالسعادة كيف بتعطينها ؟
الموظف التعيس لايقول غصبن علي مالي غيرها ، شد حيلك دوّر بديل والإرزاق بيد الله ، مابتعطي دامك مو مرتاح
إذا كنت نعسان أجّل الإجتماع
إذا كنت تعبانه لاتطبخين غداء
إذا سهرت لعذر مو بيدك لاتداوم
الناس تقدرّك لمن تقدّر نفسك ، تضحياتك محد بيدري عنها
محد بيعيش عنك حياتك لامجتمع ولاقبيلة
# مش دعوة للامبالاه و عفس الحياة ، ولكن لنفسك عليك حق ، تذكر دائماً الرسول اللهم صلّ وسلم عليه قال : [ ابْدَأْ بِنَفْسِكَ فَتَصَدَّقْ عَلَيْهَا ، فَإِنْ فَضَلَ شَيْءٌ فَلأَهْلِكَ ، فَإِنْ فَضَلَ عَنْ أَهْلِكَ شَيْءٌ فَلِذِي قَرَابَتِكَ ، فَإِنْ فَضَلَ عَنْ ذِي قَرَابَتِكَ شَيْءٌ فَهَكَذَا وَهَكَذَا ] ، في كُل شيء ألزم ماعليك نفسك وسعادتها .
🖇
" شخصية المجلة "
هالشخصية من ألذ الشخصيات فالحياة ، الجلسة معاها ماتنمل ، والطلعة و السفر أحلى مايكون معاها ..
هالشخصية تعرف في كل شيء ، إيه كل كل شيء
إن شافت ورود سمتّلك أنواعها ويمكن حتى وين تنمو
و إن شافت أكل قالت أوووووه الطبق الفلاني من الدولة الفلانية
و إن انحرقتي أو انقرصتي أو مرضتي قالت حطي عسل أو اشربي هالعشبة
و إن شافت صورة لشخص قالت هذا فلان الفلاني ماشاء الله عليه عمل وعمل وعمل
في الطب تلاقينها في الثقافة في العناية في الضحك و المزح في الدين فكل شيء تلاقينها
# هالشخصية مستحيل تقعدين معاها وتجي فترة سكووووت محرجة ، ومستحيل تنتهي جلستك ما استفدتي منها ، شخصية تحسسك بالإنتعاش وإنو الحياة ملياااانه حاجات نجهلها ، تحمسك تتعلمين وتقرأين وتطلعين أكثر ، إن ماكنت أنت هالشخصية كوني صديقتها 👌🏼
🖇
" الروح الخفيفة "
محد يحب الإنسان الثقيل ، الإنسان المحبوب هو الخفيف دائماً ، أكرمي نفسك قد ماتقدرين ولاتخلين أي مخلوق إذا دخلتي عليه يقول اووووف جات النشبه أو جات الغثيثه ..
كيف أكون خفيفه روح ؟
اخدمي نفسك بنفسك ، لاتتخدمين بالأوادم حتى لو كان ع طريقه أو هو أساساً رايح يسوي نفس الشيء اللي تبينه
جد جد هالصفة مهمة ولو كنا مو حاسين
لاتستخدمين أغراض غيرك ولو الكل استخدمها
لا تمدين يدك ولو بالمزح ولا تتلفظين بمسبات ولو كان الطرف الثاني راضي ويضحك
لاتعزمين نفسك ع أكل أحد مهما طاحت الميانة بينكم ، ولاتتخدمين فأحد ولو كان أصغر منك
لاتكثرين زيارات ولاتطولين ولاتعزمين نفسك بنفسك ، وجسّي النبض بمدى تقبّل الناس لك لو حسيتي إنهم ملّوا أو مشغولين انسحبي بنفسك
اشكري ، امدحي ، امزحي ، وانصحي
لاتغتابين أحد قدام أحد ثاني لأنو هالثاني مهما اندمج معك فالغيبة بينطبع في مخه إنك ممكن تسوين فيه عند الناس نفس الشيء
لذلك كل إنسان يقيس نفسه بغيره ، لاتخلين أحد يتوقع منك شيء سيئ من وراه بالعكس خلي الإنطباع عنك إنو ولو قالوا عنك مايصدقون ع طول يردون : إلا فلانة ماتسويها ..
# وهلمّ جرا ، شوفي إش تتضايقين من غيرك ولاتسوينه ، إش تحبين فغيرك وسويه ، وخليك لبيبه ✨
🖇
" حياة اليوتيوب ، والأفلام "
تعرفين فلوقات اليوتيوب و روتين الصباح و المساء ؟
تشوفين كيف يقومون بترتيب ويفطرون شيء مرتب وكشخه ويتهندمون وينظمون وقتهم ؛ خل نتغاضى إذا كان جد أو مجرد تمثيل ولكن خلي حياتك مرتبة وحلوة وكشخة نفسهم ، مولازم للتصوير نمثل الواو والحقيقة قربعة ، تخيلي إنك في برنامج واقعي ، شوفي شلون بتتصرفين " وممكن تتخيلين إنسان تحبينه يتابعك بعد 😉" بتلاحظين حتى لمن تكونين لحالك بتبقين محافظة ع تصرفاتك وحركاتك "
+
وضعت القوانين ليلتزم بها البعض وليخترقها آخرون
اخترقي القوانين واتجنني ، سوي اكشنات فحياتك عيشي شعور الرعب ، بس لاتسوين جنان يوديك السجن 😹
قيد تابعتي فيلم كانت البطلة فيه مجنونه ولزيزه وطعمونه ؟ حركاتها كيوت تغني وترقص وتدندن ، تلاعب الأطفال بلطافه و تنطنط ، تتصور بدلع و تصرفاتها م ج ن و و و و ن ه ؟
بالزبط هذي البنت و الأخت و الصديقة و الزوجة و الأم اللي تجذب
جانبها الطفولي و المجنون طاغي على الثقيل و الجاد > وطبعاً هالجانب مايطلع عند أي أحد 👌🏼
🖇
" التأثير اللامقصود "
خلال هالسنة تغيرت تغير كبييييير من ناحية التفكير والتصرفات و المعتقدات ، حتى الإهتمامات ، فيوم وأنا اتفرج على صور وفيديوهات قديمة وعيت عالإختلاف اللي حصل لي ، حتى لمن اقرأ تغريداتي القديمة ألاقي اختلاف ملحوووظ في تفكيري و إهتماماتي ، لمن ركزت في سبب التغيير لقيت حسابات السناب و الإنستا هم السبب ، الحمد لله إنو التغيير كان إيجابي ، اهتمام بالرياضة و العناية والقراءة والفاشن و والعطور أكثر ، حب النفس والإهتمام بالدين أكثر ، زيادة خبرة وتغذية بصرية في التصوير و التنسيق و الديكور ، حتى في الدورات الاونلاين و الدورات علي السنابشات وغيره ؛ الجانب السلبي الوحيد كان تشويش فكرة حرية المرأة و انو الزواج مأساة وعذاب وغيرو ، لكن تداركت نفسي الحمد لله وحذفت السلبي منهم واستبدلتهم بناس ينظرون لهالموضوع بطريقة حلوة ولو إنهم قليل لكن بدأت تفك العقدة الحمد لله
# التغيير اللي يجي فجأة يروح فجأة ، إذا بتغيرين شيء فيك أو تضيفين عادات كويسة ابدأي بالتدريج ، اضيفي ناس من هالمجال لحياتك بدون تركيز بتلاقينك اكتسبتي منهم ، وهالشيء كنت بنوّه عليه كمان خلي عندك ثقافة التقليد الإيجابي خذي من الناس ضحكتهم الحلوة ، لزماتهم الحلوة " اللزمة هي الكلمة اللي يكررونها بكلامهم كثير " اهتماماتهم أو عاداتهم الحلوة ، خليك مغناطيس للأشياء الحلوة 😽
🖇
" حدد طقوس معينة لأشياء مختلفة "
أيامك لازم تكون مشكلة و ملونة ، لكِ و لأهلك واللي حولك ، عشان تحسين بطعم كل مناسبة كل فترة ، اربطي في ذهنك أمور بـِ أمور
زي ما ارتبط بالشتاء البر والتخييم ، الزنجبيل والسحلبزي مارتبط الفانوس والسمبوسة والفيمتو برمضان
زي مارتبط بالعيد الحلا و اللبس الجديد والأناشيد
فرّقي بين أيام الأسبوع ، خلي مثلاً الجمعة له طقوس مختلفة تماماً ، صحية بدري بخور وقهوة و تنظيف و عشاد فمطعم مثلاً ، أو جمعة عائلية .
فرقي بين شهور السنة ، مثلاً فشهر محرم من كل سنة ناخذ عمره ونزور مكة و المدينة ، في صفر نتبادل الهدايا بشكل عائلي بطريقة القرعة مثلاً ، في ربيع ١ رحلة للبحر فيها شوي وسباحة وصيد ، وفي شعبان نسوي شعبنة حجازية ، وفي رمضان نسوي قريقعان ، وهكذا لكل شهر حدث مميز .
أيام الدورة الشهرية مثلاً تكون طقوسها غير عن باقي الشهر
أيام الإمتحانات غيري مكان نومك وطريقة مذاكرتك و حوسي المكان بالكتب والأوراق ، عشان بس تخلصين ترجعين ترتبين بيكون الشعور فعلاً تغيير نفسي شاسع
# هالتغييرات مهما كانت بسيطة بتفرق بنفسيتك كثيييير لاتستهينين فيها ، زينة رمضان كيف شعورنا لمن نعلقها وكيف شعورنا لمن نشيلها ، شيء بسيط خارجياً بس عميق داخلياً .
📎
" أحِب ماتكره "
بعض الأشياء ما خُيرنا فيها ، ومانقدر نغيرها مهما كانت سيئة ، أمك و أبوك ، شكلك وجسمك ، الدراسة أو الوظيفة ، الأبناء أو المدينة اللي تعيشين فيها .
أكيد مابنقعد طول عمرنا نتحلطم عليها ونمثل الجانب الكئيب من حياتنا عليها ، حبيها شوفيلك حل وبطريقة ما حبيها ، لازم تحبينها ، دوري إيجابيات جسمك وعززيها ، ودوري سلبياته وحبيها ، شوفي الجوانب الجميلة للمدينة وابرزيها ، دراستك فترة وتعدي وتكون ذكرياتك فحياتك معليش اضغطي ع نفسك شوي بتشكرينها بعدين ، تغاضي عن مساوئ أهلك أو أولادك وشخصياتهم وتعايشي ، تعلمي تتعايشين لأنو الدنيا مو ممهدة لأحد وماحد كامل .
# لاتخلين سلبيات شيء تعميك عن إيجابياته .
🖇
" حكم عقلك و استفت قلبك "
في زمن ضاع فيه العلم وتخبط معظم العلماء ، حكّمي عقلك ، المعلومة اللي ماتخش العقل لو أطلق متخصص قالها لاتصدقينها ، الشيء اللي مو مقتنعة فيها لاتؤمنين فيه ، الفتوى اللي تناقض تفكيرك لاتاخذينها " إذا كانت مجرد رأي مافيها دليل قاطع " ، مو لأنه العلامة فلان بن فلان يعني كل كلامه صح ١٠٠٪ ، ربي لمن يحاسبك مابتقولين فلان قال ، ربي خلق لكل مخلوق عقل يميز فيه ، شوفي قلبك لأي فتوى يرتاح وقولي بسم الله ، والأهم اطلعي ع رأي أكثر من متخصص وقارني بينهم وخذي الأقرب لرأيك ، أما إن شفتي نفسك تميلين إلى ماتهوين فألزمي نفسك بشخص تثقين برأيه وكلامه .
# لاتكوني إمعه فين ماتروح الجماعة رحت ، و إن بقيتي وحيدة .
الشكوى لغير الله مذله ، لاتشكين لمخلوق لاتشكين لمخلوق
إن شكيتي لمُحب حزن ومابيده شيء
و إن شكيتي لكاره فرح ومابيده شيء
الشكوى للناس ماتجلب إلا الشفقة ، ومحد يحب إحساس المشفوق عليه
مهما يسير في حياتك من مشاكل اظهري الجانب القوي عند الناس ، والضعيف عن رب الناس
لايدري أهل بيتك عن مشاكل عملك
ولا أهل عملك عن مشاكل بيتك
ولامشاكل زوجك عند أهلك
ولا مشاكل أهلك عند زوجك
البيوت أسرار ، والناس ماتنسى ، مهما مضى الزمن إلا ما يعايرونك بماضيك
مو بس الجانب السلبي ، حتى الإيجابي منه
مولازم تفصفصين للكل قد إش أبوك يحب أمك أو قد إش زوجك مغرقك هدايا ، أو قد إش وظيفتك مريحة والموظفين يحبونك وراتبك واااو
صحيح [ وَأَمَّا بِنِعْمَةِ رَبِّكَ فَحَدِّثْ ] لكن لو بحثنا عن تفسيرها بيكون معنى الآيه إنك ماتنكرين نعمة الله وتجحدينها ، أو يكون ربي منعم عليك ولكن حالك يرثى له ، ربي يحب يشوف أثر نعمته على عبادة ، لكن في الأشياء الظاهرة مو الخفية اهايط فيها عند كل من هب ودب ومادري مين يعاني لأنو فاقد هاللي قاعدة اهايط فيه .
والرسول عليه الصلاة والسلام قال : [ استعينوا على إنجاح الحوائج بالكتمان فإن كل ذي نعمة محسود ] ، عيشي سعادتك وحزنك في محيطك .
" دامت أيامكم سعيدة "
❤
2 comments