#موقع | إدراك ؛ العِلم لمن يريد ♣
" السلام عليكم ورحمة الله وبركاته "
صباحِك / مساءِك ثقافة
موقع إدراك من المواقع اللي اعتبرها كنز فعلياً ، كنز عظيم إنك بتتعلّم وبتاخذ دورات و إنت في مكانك ، ولأننا في مرحلة نهضة ثقافيّة مع إنتشار السوشال ميديا و ثورة القراءة الجميلة الحاصلة حالياً ؛ أشوف إنو لازم كل شخص عربي لازم يعرف بهالموقع ويستفيد منه ..
❜ بالمختصر المفيد : هو عبارة عن صفحة ويب تقدم دورات مجانية أون لاين ، في مجالات عديدة ، بعض الدورات متاحة في جميع الأوقات ، وبعضها محددة فترة طرحها فقط .
* إدراك هي مبادرة من مؤسسة الملكة رانيا للتعليم والتنمية
تجربتي معاه كانت جميلة ، وبإذن الله راح اختّم كل الدورات الموجودة ، تعالو نشوف إش مميزاته وليش اعجبني لهالدرجة ! :
❞ سهولة الموقع ..
حتى مايحتاج اشرح ، كل شيء موضّح ، وخانات البحث والإستفسار بكل مكان .
❞ كل شيء مجاني ..
شاركي باللي يعجبك ، مو خسرانه أي شيء ، وهالشيء يحمسك تدخلين وتجربين كل المساقات .
❞ جميع المجالات موجودة ..
كل مجال يخطر ببالك بتلاقينه غالباً ، ولو مو موجود تقدرين تقترحين عليهم يوفرونه .
❞ السهولة و البساطة ..
حسب تجربتي مع مساق الإسعافات الأولية ، كانت المحاضرات بين الدقيقة و العشر دقايق فقط .
✗ السلبية الوحيدة هي إنو بعض المساقات المنتهية ماتقدرين تشتركين فيها ، لكن ممكن تطلبين إعلامك عالإيميل في حال تم طرح المساق من جديد .. وفيه مساقات دائمة متاحة في كل وقت .
نشوف الموقع ..
واجهة الموقع
سجّلو بالموقع ، وبعدها مرّو عالمساقات ، اختارو الي يعجبكم حتى تسجلون فيه ..
تجون نسجل مع بعض في مساق حالي ، وتكتبون لي تجربتكم بعد إنتهاء المساق 👏🏼😻
أنا راح اسجل بمساق مقدمة في التصميم الجرافيكي ، يبدأ في ١٤ مارس " يعني اليوم بدأ " ، بس راح اكتب تجربتي بناء ع المساق الي حضرته قبل ثلاث شهور " الإسعافات الأولية " ..
هذا رابط دورة التصميم الجرافيكي [ هنا ]
اضغطوا ع سجل الان ..
بتفتح لكم صفحة تسجيل ، أو تسجيل دخول .. بمجرد ماتعبون البيانات راح تتسجلون دغري ، وتطلع لكم هالصفحة
طيب ، بعدها ندخل على المساق نفسه " الشرح على مساق الإسعافات الأولية " ، لكن جميع المساقات بنفس الشرح ...
في القائمة عاليمين نلاقي ترتيب الأسابيع وبداخلهم محاضرات كل اسبوع ع حدة ، وفي نهاية الاسبوع فيه إختبار لازم تجاوبين عليه ..
عاليسار نلاقي شريط من أربع خانات ، الخانة الأولى نبذة عن محتوي المحاضرة ، الخانة الثانية فيديو المحاضرة ، الخانة الثالثة إختبار من ثلاث اسئلة تقريباً يخص المحاضرة ، الخانة الرابعة مساحة لطرح الأسئلة و المناقشة مع المحاضر والمسجلين معك في المساق ..
❜ طيب خلصت كل المحاضرات ، وبعدين ؟
أخيراً بعد حضور جميع المحاضرات ، وحل الإختبارات الأربع الخاصة بكل اسبوع ، نعبي الإستبيان الختامي ، لتقييم المساق .
بمجرد إنتهائك منه وتسليمه تكون اجتزت المساق ، وفي كل مساق فيه مفاجأة تفتح بعد اجتياز أغلب المشاركين للمساق ..
مفاجأة مساق الإسعافات الأولية كان ...
م اهتميت للفيديو قد م اهتميت بالنسخة البي دي اف من المحاضرات ، كان خوفي انسى الي اتعلمته وصعب ارجع للمحاضرات وحدة وحدة ، فالكتاب مجمعهم بطريقة سهل توصلين لها .
كمان ارسلوا لي عالإيميل شهادة ووسام العمل الجماعي ، حركة لطيفة منهم :)
الموقع جداً جميل ومفيد للإستزادة من العلوم العامة من ناس متخصصين ، وهو خيار جميل للي يبغون يزيدون ثقافتهم بغير الكتب والقراءة ..
اتمنى انكم استفدتوا ، ولو تعرفون مواقع شبيهه فيه شاركوني إياها ..
" دُمتم بـ سعادة "
❤
12 comments